Abantu babiri batawe muri yombi bakekwaho kwambura abaturage biyitiriye abakozi ba sosiyete y’amashanyarazi
Abantu babiri batawe muri yombi bakekwaho kwambura abaturage biyitiriye abakozi ba sosiyete y’amashanyarazi
Abantu babiri bafashwe na RIB bakekwaho kwambura abaturage amafaranga biyitiriye abakozi ba EUCL, bakoresheje impapuro n’ibyangombwa by’impimbano mu bice bitandukanye bya Kigali.
Urwego rw’Igihugu rw’Ubugenzacyaha , Rwanda Investigation Bureau (RIB) rwatangaje ko rwataye muri yombi abantu babiri bakekwaho ibikorwa byo kwambura abaturage amafaranga mu buryo bw’uburiganya, biyitiriye abakozi ba sosiyete ishinzwe gukwirakwiza amashanyarazi mu Rwanda, Energy Utility Corporation Limited.
Aba bantu bafatiwe mu Karere ka Gasabo nyuma y’amakuru yatanzwe n’abaturage bavuga ko hari abantu bagendaga mu ngo zitandukanye babeshya abaturage ko baturutse muri EUCL ( sosiyete yo mu Rwanda ishinzwe gukwirakwiza no kugeza amashanyarazi ku baturage, ibigo n’inganda) bagiye gukemura ibibazo by’amashanyarazi cyangwa gusuzuma imikorere ya mubazi z’amashanyarazi.
Iperereza ry’ibanze ryakozwe na RIB ryagaragaje ko abo bakekwa bambaraga imyambaro isa n’iy’abakozi b’ibigo bitanga serivisi z’amashanyarazi kugira ngo abaturage babizere byoroshye. Bageraga mu rugo rw’umuturage bakamubwira ko hari ikibazo cyagaragaye kuri mubazi ye cyangwa ko hari amafaranga atarishyurwa neza muri sisiteme, bityo bagasaba amafaranga kugira ngo icyo kibazo gikemuke.
Hari bamwe mu baturage bavuga ko babasabaga amafaranga ari hagati ya ibihumbi 20 Frw na 150 Frw, bababwira nibatishyura ayo mafaranga bahita bahagarikirwa serivisi z’amashanyaraza. Kubera ubwoba bwo kubura amashanyarazi, hari abaturage bahitaga batanga ayo mafaranga batabanje kugenzura niba abo bantu koko ari abakozi ba EUCL.
Amakuru akomeza avuga ko abo bakekwa bakoreshaga impapuro n’ibyangombwa by’impimbano byari bifite ibirango bisa n’iby’ibigo bya Leta, ndetse bamwe bakitwaza lisiti zanditseho amazina y’abaturage n’inomero za mubazi kugira ngo birusheho gutuma abaturage babagirira icyizere.
RIB yavuze ko nyuma yo kwakira amakuru yatanzwe n’abaturage, yakoze iperereza ryihuse rifasha gufata abo bantu mbere y’uko bakomeza ibikorwa byo kwambura abaturage amafaranga. Kuri ubu bafungiye kuri sitasiyo ya RIB ya Remera mu gihe iperereza rigikomeje kugira ngo harebwe niba nta bandi bantu bakoranaga muri uwo mugambi.
Urwego rw’Igihugu rw’Ubugenzacyaha rwibukije abaturage kujya bagira amakenga igihe cyose bagezweho n’abantu bavuga ko baturutse mu bigo runaka, cyane cyane ababaka amafaranga mu buryo butazwi cyangwa batatanze inyandiko zemewe. Rwasabye abaturage kujya babanza guhamagara ibigo bivugwa cyangwa se bagatanga amakuru ku nzego zibishinzwe igihe cyose hari ibyo bashidikanyaho.
RIB yanihanangirije abantu bose bishora mu bikorwa byo kwiyitirira ibigo cyangwa inzego za Leta bagamije kwambura abaturage, ivuga ko ibikorwa nk’ibyo bihungabanya umutekano n’icyizere abaturage bafitiye ibigo bitanga serivisi, kandi ko ababikora bazakurikiranwa n’amategeko.
Abaturage bo mu bice bitandukanye bya Kigali bavuga ko ibikorwa byo kwiyitirira abakozi b’ibigo bitanga serivisi bimaze iminsi byiyongera, cyane cyane mu bijyanye n’amashanyarazi, amazi ndetse na serivisi z’itumanaho. Basaba ko hakongerwa ubukangurambaga kugira ngo abaturage barusheho kumenya uko bakwirinda bene abo bantu bakoresha uburiganya.
