Abagabo bane bo mu Karere ka Kamonyi batawe muri yombi bakekwaho kwiba ihene 12 z’umuturage wo mu Karere ka Ruhango, nyuma yo kuzifatanwa bari bamaze kuzihisha mu rugo rw’umwe muri bo, mu gikorwa cyakozwe ku bufatanye bwa Polisi n’abaturage.

Ibi byabaye mu gitondo cyo ku wa 18 Gicurasi 2025, mu Murenge wa Gacurabwenge, Akagari ka Kigembe, aho abaturage bakekereje ibikorwa by’aba bagabo bahise batanga amakuru ku nzego z’umutekano, Polisi ikahagera vuba ikabafatira mu cyuho.

Amakuru atangwa n’inzego z’umutekano avuga ko izo hene zari iz’umuturage utuye mu Mudugudu wa Mushimba, Akagari ka Gisare, Umurenge wa Kinazi mu Karere ka Ruhango. Abakekwa bazikuye aho zari ziri nijoro bazitwarira icyarimwe bazerekeza mu Karere ka Kamonyi, bakeka ko batazamenyekana.

Abaturage bo mu gace aba bagabo banyuzemo bavuga ko babanje gukeka imyitwarire yabo, kuko bagaragazaga ubwoba ndetse bakagenda bahisha ayo matungo. Bamwe mu baturage bahise bahamagara inzego z’umutekano kugira ngo hakorwe ubugenzuzi.

Polisi yahise ikurikirana ayo makuru maze isanga izo hene zihishwe mu rugo rw’umwe mu bakekwa, bose bahita batabwa muri yombi.

Umuvugizi wa Polisi mu Ntara y’Amajyepfo, Kamanzi Hassan, yavuze ko abafashwe bahise bajyanwa kuri Sitasiyo ya Polisi ya Runda kugira ngo bakurikiranwe n’inzego zibishinzwe.

Yagize ati: “Abafashwe bahise bajyanwa gufungirwa kuri Sitasiyo ya Polisi ya Runda, mu gihe Urwego rw’Igihugu rw’Ubugenzacyaha rwatangiye iperereza kugira ngo hakurikizwe amategeko.”

Yakomeje avuga ko ihene zose uko ari 12 zamaze gusubizwa nyirazo, ndetse ashimira abaturage bakomeje kugira uruhare mu gutanga amakuru afasha mu gukumira ibyaha.

Ati: “Ubufatanye bw’abaturage n’inzego z’umutekano bukomeje kugira uruhare rukomeye mu gufata abakora ibyaha. Iyo abaturage batanze amakuru ku gihe, bituma ibikorwa by’ubujura n’ibindi byaha bikumirwa hakiri kare.”

Bamwe mu baturage bo mu Karere ka Kamonyi bavuga ko ubujura bw’amatungo bukomeje guteza impungenge, cyane cyane mu bice by’icyaro aho abaturage benshi batunzwe n’ubworozi. Basaba ko hakomeza kongerwa amarondo ndetse n’ubukangurambaga bwo kurwanya ibyaha.

Umwe mu baturage yagize ati: “Iyo umuntu yibwe amatungo aba yatakaje umutungo munini cyane. Turashimira Polisi kuba yarafashe aba bakekwa vuba kandi amatungo agasubizwa nyirayo.”

Polisi y’u Rwanda yongeye kwibutsa abantu bose bakomeje kwishora mu bikorwa by’ubujura ko batazihanganirwa, ishimangira ko ubujura atari umwuga ahubwo ari icyaha gihanwa n’amategeko.

Yanaburiye abakomeje gukorana n’abajura mu guhisha ibintu byibwe cyangwa kubafasha kubigurisha ko na bo bashobora gukurikiranwa n’amategeko, kuko bifatwa nk’uruhare mu cyaha.

Kwamamaza ibikorwa byo gukumira ibyaha, gukaza amarondo no gukorana bya hafi n’abaturage ni bimwe mu bikorwa Polisi ivuga ko bikomeje gutanga umusaruro mu guhangana n’ubujura bw’amatungo n’ibindi byaha bibangamira umutekano w’abaturage.