Mu Misa ya Pasika yabereye muri Bazilika ya Mutagatifu Petero, Papa Leo XIV yavuze ko Izuka rya Yezu Kristu ari ikimenyetso cy’intsinzi y’urukundo ku rwango ndetse n’urumuri rutsinda umwijima w’amacakubiri.

Yagaragaje ko Pasika atari ibirori bisanzwe bya gikirisitu, ahubwo ari umwanya wo kwisubiraho no kuvugurura imitima, aho abantu bahamagarirwa kureka inzangano, imbwirwaruhame z’urwango n’ibitekerezo bitanya abantu.

Papa Leo XIV yavuze ko isi iri kunyura mu bihe birangwa n’intambara, amakimbirane ya politiki n’iyangirika ry’imibanire hagati y’abantu, ibintu asanga bituruka ku kubura urukundo n’ubwiyunge. Yashimangiye ko abakirisitu bagomba kuba abatangiza amahoro aho batuye hose, aho kuba abongera amacakubiri.

Mu butumwa bwe, yasabye abayobozi b’ibihugu gushyira imbere indangagaciro z’ubumuntu n’ubwubahane, agaragaza ko amahoro arambye adashobora kugerwaho hifashishijwe imbaraga gusa, ahubwo ashingira ku mbabazi no kubabarirana.

Yagize ati: "Pasika ni igihe cyo kongera kwizera ko ikibi kidashobora gutsinda burundu, kuko Izuka rya Kristu ritanga icyizere cy’ubuzima bushya ku bantu no ku isi yose."

Abasesenguzi bemeza ko Kiliziya Gatolika ikomeje gukoresha iminsi mikuru nk’iyi mu gutanga ubutumwa bugamije kunga abantu no kubaka isi irangwa n’amahoro mu gihe isi ihanganye n’ibibazo bikomeye by’umutekano n’amacakubiri ashingiye ku nyungu za politiki n’ubukungu.

Ku Bakirisitu hirya no hino ku Isi, Pasika ikomeza gufatwa nk’umusingi w’ukwemera, wibutsa ko nyuma y’umubabaro haza ubuzima bushya, kandi ko urukundo rufite imbaraga kurusha urwango

Yanditswe na nkurunziza Bonaventure