Abaturage bo mu Mudugudu wa Karisimbi, mu Kagari ka Cyivugiza mu Murenge wa Nyamirambo mu Karere ka Nyarugenge, babujijwe amahwemo n’igikorwa cy’ubugome cyavumbuwe kuwa wa 15 Mata 2026. Ni nyuma y’uko abubatsi babonye umurambo w’uruhinja wari ufunze mu gipapuro (envelope) ujugunye aho bari bari kumena itaka.

Uko umurambo wavumbuwe

Abakozi bari mu mirimo y’ubwubatsi batangaje ko icyatunze agatoki aho uyu muziranenge yari ari, ari isazi nyinshi zagaragaraga aho bari bari gukora. Bamaze kwegera hafi ngo barebe icyaba giteza izo sazi, nibwo babonye agahashyi karimo uruhinja rwakuwemo mu buryo bwo gukuremo inda, maze rurahajugunywa.

Ababonye ibi byago bagaragaje agahinda kenshi. Umwe mu babyeyi bubakaga aho yagize ati: "Birababaje kubona umuntu yica ikiremwamuntu nk'iki. Urubyiruko rukwiye kwigishwa kuko ubu ni ubugome bukomeye bitigeze bibaho ati muri macye ni ubunyamaswa."

Umuvugizi wa Polisi y’u Rwanda mu Mujyi wa Kigali, CIP Wellars Gahonzire, yemeje ko aya makuru yageze mu maboko yabo kandi ko iperereza ryamaze gutangira. Yavuze ko inzego z’umutekano ziri gushakisha uwayishoye mu gikorwa cyo gukuramo iyo nda no kujugunya uwo mwana kugira ngo agezwe imbere y’ubutabera.

Kugeza ubu, umurambo w’uwo mwana wajyanywe ku Bitaro bya Nyarugenge kugira ngo ukorerwe isuzuma rya muganga rizifashishwa mu kumenya ukuri kose kuri iki cyaha.

Iki gikorwa kije cyibutsa imibare iteye inkeke igaragazwa n’ubushakashatsi bw’ikigo Lancet Global Health, bwerekanye ko ku rwego rw’isi, hejuru ya 60% by’abagore basama inda zitateganyijwe bahitamo kuzikuramo. Mu Rwanda, gukuramo inda bihanwa n’amategeko, uretse mu buryo bwihariye bwateganyijwe n’amategeko cyangwa iyo ubuzima bw’umubyeyi buri mu kaga gakomeye.