Abasirikare bakuru bakomeye 41 barimo Abajenerali 35 n’Abakoloneli 6 bari kuryozwa intsinzi za M23
Abasirikare bakuru bakomeye 41 barimo Abajenerali 35 n’Abakoloneli 6 bari kuryozwa intsinzi za M23
Abasirikare bakuru 41 barimo Abajenerali 35 n’Abakoloneli 6 muri Repubulika Iharanira Demokarasi ya Congo, bahamagajwe ngo basobanure uburyo inyeshyamba za M23 zakomeje kubakubita inshuro kuva mu 2022 ku mupaka wa Bunagana kugeza i Bukavu muri Kivu y’Amajyepfo.
Aba bahamagajwe n’Urwego rw’Ubugenzuzi Bukuru bw’Ingabo mu Gisikare cya Congo, FARDC.
Gen. Maj Sylvain Ekenge, umuvugizi wa FARDC yatangaje ko ibi biri mu nshingano z’Urwego rw’Ubugenzuzi Bukuru bw’Ingabo.
Ati” Bigamije kubona ibisobanuro ku nshingano za buri ruhande muri uku gutsindwa kwa gisirikare gufite ingaruka zikomeye ku rwego rwa gisirikare no ku mutekano.”
Uku kubazwa kureba abasirikare bose bagize inshingano mu Burasirazuba bwa Congo kuva umujyi uherereye ku mupaka wa Bunagana wafatwa n’inyeshyamba za M23 mu kwezi kwa Kamena 2022.
Abo bireba barimo abayobozi kuva ku rwego rw’ubugenzuzi bukuru bwa FARDC kugeza ku rwego rwa Sokola 2 yo mu Ntara ya Kivu y’Amajyaruguru, barimo kandi abayobozi b’ingabo zirwanira ku butaka, izirwanira mu mazi, izirwanira mu kirere, ndetse n’ibiro by’Umugaba w’Ingabo byari mu buyobozi bwa gisirikare mu Ntara ya Kivu y’Amajyaruguru.
Aba barimo: Général Tshiwewe Songesha Christian wahoze ari Umugaba Mukuru w’Ingabo za Congo akaba aherutse kuregwa gushaka kwica Perezida Felix Tshisekedi , Lieutenant-Général Baumanda Ntumba Franck, uyu akaba Umuyobozi ushinzwe ibikorwa by’igisirikare mu ngoro ya Perezida wa Repubulika, nawe arenganwa na Tshiwewe
Harimo kandi Général-Major BombeIe Lohola Camille wigeze kuba umuhuza bikorwa wa Operation Sujja y’Ingabo za Congo n’iza Uganda , Général-Major Sylvain Ekenge uvugira FARDC nawe yahamagajwe.
Mu bandi bazaryozwa itsinzi za M23 barimo Lt Gen Constant Ndima wayoboye Intara ya Kivu y’Amajyaruguru, Gen Chico Tshitambwe Jérôme na Lt Gen Padiri Bulenda David uyobora Inkeragutabara.
Kuva inyeshyamba za AFC/M23 zigarurira ibice byinshi mu Burasirazuba bwa Congo, Abasirikare batsinzwe urugamba biswe abagambanyi ndetse bamwe bajya no mu nkiko za Gisirikare bakatirwa urwo gupfa bashinjwa guta urugamba.
Nko muri Werurwe 2025, Urukiko rwa gisirikare rukorera mu mujyi wa Butembo mu ntara ya Kivu y’Amajyaruguru, rwakatiye abasirikare 55 igihano cy’urupfu, rubashinja guhunga umutwe witwaje intwaro wa M23 mu rugamba rwabereye muri Teritwari ya Lubero.
Urutonde rugari rw’abahamagajwe:
Henriette UWAMAHIRWE
