Amajyaruguru: Polisi yangije litiro zisaga 10.000 z’ibinyobwa bitemewe byangizaga abaturage
Amajyaruguru: Polisi yangije litiro zisaga 10.000 z’ibinyobwa bitemewe byangizaga abaturage
Polisi y’u Rwanda ikorera mu Ntara y’Amajyaruguru yakoze umukwabu wo gufata no kwangiza ibinyobwa bitemewe, bigira uruhare mu guhungabanya umutekano ndetse bikaba bishobora no gutera uburwayi ababinywa.
Muri uyu mukwabu, wakozwe k’ubufatanye n’inzego zitandukanye hafashwe ibinyobwa bitemewe bisaga litiro ibihumbi 10, byitwa amazina atandukanye bitewe n’agace bikorerwamo, bikaba byinshi bihuriye ku gukorwa hifashishijwe isukari, umusemburo wa Pakimaya, amajyani, melase, ikinyabuzima n’ibindi.
Umuvugizi wa Polisi mu Ntara y’Amajyaruguru, IP Ignace Ngirabakunzi, ashimira abaturage batanga amakuru y’aho ibi binyobwa bikorerwa, bagatuma byangizwa bitaragira ingaruka ndetse n’ababikora bagahanwa.
Yagize ati “Ibi byose Polisi ibikora ku makuru atangwa n’abaturage bitewe n’uko bamaze gusobanukirwa ingaruka z’ibinyobwa k’umutekano ndetse no ku mibereho yabo. Abaturage barabimenye ko aho ibinyobwa bitujuje ubuziranenge byageze, harangwa n’ibikorwa by’urugomo, ubusinzi, amakimbira n’ubujura bityo ntibakwiye kubiha umwanya. Icyo tubasaba ni ubufatanye mu kubirwanya no kubyirinda.”
Yakomeje agira ati “Icyambere dusaba abaturage ni ukwamagana ibinyobwa bitujuje ubuziranenge ndetse bakanabyirinda kuko ubinyoye bimugiraho ingaruka mbi haba mu mibereho no k’ubuzima.”
Polisi y’u Rwanda ivuga ko izakomeza gukangurira abaturage kwirinda kunywa ibinyobwa bitujuje ubuzirange kugeza bumvise neza ingaruka zabyo bityo ababikora nabo bakazagabanuka cyane ndetse bakaba banareka kubikora bitewe no kubura ababinywa.
Ibinyobwa bitujuje ubuzirange byafashwe byamenwe mu ruhame, ababikora bashyikirizwa inzego zibishinzwe kugira ngo bahanwe.
Ubuyobozi bw’Intara y’Amajyaruguru buhora bushishikariza abaturage kwirinda ubusinzi kuko bwagaragaye nk’intandaro y’urugomo, gusesagura umutungo w’urugo uba ukwiye kuba ukoreshwa ibindi bibateza imbere, uburwayi butandukanye n’ubunebwe kuko uwasinze adakora.
By’umwihariko, ibinyobwa bitujuje ubuziranenge bikunze guteza ingaruka zirimo gucibwamo, kuruka, guhuma ndetse hari n’aho byagiye biteza impfu ziturutse ku rugomo n’iziturutse ku buryo biba byatubganyijwe bigahinduka uburozi.
Raporo y’Ishami ry’Umuryango w’Abibumbye ryita ku Buzima, (OMS), 2024 yagaragaje ko abantu miliyoni 2.6 buri mwaka bapfa bazize kunywa ibisindisha, bakaba bangana na 4.7% by’imfu zose muri rusange.
Iyo raporo ya OMS yitwa ‘Global status report on alcohol and health and treatment of substance use disorders’ ivuga ko ibisindisha n’imiti ikoreshwa nk’ibiyobyabwenge bigira ingaruka zikomeye ku buzima ndetse abangana na miliyoni 400 ku Isi babana n’ibibazo biterwa no gukoresha ibiyobyabwenge.
Yanditswe na nkurunziza Bonaventure
