APR FC yatsinze Muhazi United mu mukino wo ku munsi wa 29 wa shampiyona y'icyiciro cya mbere mu Rwanda, ihita yegukana igikombe cy Shampiyona nyuma y'uko Rayon Sports bari bahanganye inganyije na Vision FC.
Uyu mukino wakinwe kuri uyu wa Gatandatu tariki 24 Gicurasi 2025 saa Cyenda kuri Stade y'akarere ka Ngoma.
Abakinnyi 11 ba Muhazi United babanje mu kibuga; Twagirayezu Amani, Mutesasira Adamu, Kagaba Nicholas, Koumba Russel, Muhamad Kyeyune, Potty Masimango Fiston, Karanzi Joseph, Kubwimana Cedric, Murangamirwa Serge, Mbanza Caleb na Bishira Latif.
Abakinnyi 11 ba APR FC babanje mu kibuga; Ishimwe Pierre, Byiringiro Jean Gilbert, Niyomugabo Claude, Aliou Souane, Nshimiyimana Yunussu, Nshimirimana Ismael Pitchou, Ruboneka Bosco, Lamine Bah, Mugisha Gilbert, Denis Omedi na Djibril Ouattara
Umukino watangiye ikipe ya APR FC iri hejuru nk'uko byari byitezwe ndetse ari nako irema uburyo imbere y'izamu. Ku munota wa 11 APR FC yashoboraga gufungura amazamu ku mupira mwiza Mamadou Lamine Bah yahinduye imbere y'izamu ashaka Denis Omedi wari usigaye arebana n'izamu gusa ariko umupira umubana muremure.
Muhazi United nayo yanyuzagamo ikabona uburyo binyuze ku mipira y'imiterekano yabonaga ariko ntibubyaze umusaruro. Ku munota wa 33 APR yaje gufungura amazamu ku mupira wazamuwe neza ubundi myugariro wa Muhazi United awukuraho akoresheje umutwe usanga Ruboneka Jean Bosco nawe ahita awuhindura imbere y'izamu usanga Djibril Outtara awushyira mu nshundura.
APR FC yashoboraga kujya kuruhuka yabonye igitego cya 2 n'ubundi binyuze kuri rutahizamu wayo Djibril Outtara gusa ntibyakunda igenda igifite 1-0.
Mu gice cya kabiri n'ubundi iyi kipe y'Ingabo z'igihugu yaje ikomeza gusatira gusa ntibigire icyo biyimarira. Impande zombi zaje gukora impinduka mu kibuga aho ku ruhande rwa APR FC havuyemo Koumba Russell na Potty Masimango Fiston hajyamo Shyaka Tresor na Mugisha Andre naho ku ruhande rwa APR FC havamo Mugisha Gilbert na Denis Omedi hajyamo Mamadou Sy na Hakim Kiwanuka.
APR FC yakomeje kurusha Muhazi United mu buryo bugaragara ariko kubona igitego cya kabiri biranga umukino urangira itahanye amanota 3 ku ntsinzi y'igitego 1-0. APR FC yahise yegukana igikombe cya shampiyona cya 2024/25 nyuma y'uko Rayon Sports yo inganyije na Vision FC.
Ku rutonde rwa shampiyona APR FC yahise igira amanota 64 aho irusha Rayon Sports amanota 4 mu gihe habura umukino umwe ngo shampiyona irangire. Bivuze ko n'iyo iyi kipe y'Ingabo z'igihugu yatsindwa umukino wa nyuma itatakaza umwanya wa mbere. Ni igikombe cya 6 kikurikiranya iyi kipe itwaye naho kikaba icya 23 mu mateka.
