Iki gikorwa cyo gutera ibiti kitabiriwe na Guverineri w'intara y’amajyaruguru bwana Mugabowagahunde Maurice, abayobozi b’Ingabo na Polisi mu Ntara y’amajyaruguru, umuyobozi w’akarere ka Burere Mm MUKAMANA Soline, abaturage n’abandi bafatanyabikorwa muri gahunda zo kurengera ibidukikije.

Guverineri w’intara y’amajyaruguru bwa Mugabowagahunde Maurice yashimye uruhare rw’inzego z’umutekano k’ubufatanye zidahwema kugaragaza mu gushyigikira ibikorwa by’iterambere n’imibereho myiza y’abaturage.

Ati “Ibikorwa nk’ibi ni ibyo kwitabwaho kugira ngo bizaduhe umusaruro twifuza, tubonereho gushimira inzego z’umutekano zagize uruhare muri iki gikorwa natwe tuzizeza ko tuzagumya gufatanya nazo mu gusigasira umutekano.”

Yasabye kandi abaturage kurangwa n’ubwitange bafatiye ku nzego z’umutekano, ati “Nk’abaturage, turamutse turebeye k’umurava n’ubwitange bigaragazwa n’inzego zacu z’umutekano, tukabyigiraho, twagera kuri buri kimwe twifuza bityo amahirwe nk’aya yo gukorana n’abashinzwe umutekano ajye atubera umwanya mwiza wo kubigiraho.”

Abaturage basabwe gukomeza ubufatanye mu bikorwa by’iterambere n’umutekano kuko izo nkingi zombi zigendana.

Umuyobozi w’akarere ka Burere Mm Mukamana Soline yibukije abaturage bitabiriye iki gikorwa cyo gutera ibiti ko ibi biti bizabafasha mu iterambere ry’ahazaza bityo abasaba kubibungabunga. Ati “Dushimire abagize uruhare bose kugira ngo ibi biti biterwe, icyo dusabwa nk’abaturage ni ukubyitaho kugira ngo bizaduhe umusaruro ukwiye mu bihe bya vuba.”

Abaturage bitabiriye iki gikorwa bongeye kwibutswa uruhare rwabo mu mutekano bityo basabwa gukomeza gukorana n’inzego zitandukanye mu gukumira no kurwanya ibyaha ndetse n’ibibazo bibangamira imibereho myiza hagamijwe umutekano urambye,basabwe Kandi gukomeza kwita cyane ku mutekano cyane muri ino minsi mikuru isoza umwaka.

Yanditswe na Nkurunziza Bonaventure