Burya M23 iteye ubwoba "MONUSCO irinze Goma na Sake bikomeje gusatirwa n’intambara"
Ingabo ziri mu butumwa bw’amahoro bw’Umuryango w’Abibumbye muri Repubulika Iharanira Demokarasi ya Congo, MONUSCO, zatangaje ko zitazemerera umutwe witwaje intwaro wa M23 gusatira Umujyi wa Goma na Sake.
Umuvugizi wa MONUSO ku rwego rwa gisirikare, Lieutenant Colonel Kedagni Mensah, mu kiganiro yagiranye na Radio Okapi kuri uyu wa 9 Gashyantare 2024, yibukije ko hatangijwe ‘Opération Springbok’ yo kurinda iyi mijyi y’ingenzi mu Ntara ya Kivu y’Amajyaruguru.
Col Mensah yagize ati “Hashingiwe ku nshingano ya MONUSCO yo kurinda abasivili, yatangije ibikorwa byinshi bya gisirikare birimo ‘Springbok’. Intego y’iki gikorwa ni ukurinda Sake n’Umujyi wa Goma.”
Yakomeje ati “Ndizeza abaturage bo muri RDC no muri Kivu y’Amajyaruguru by’umwihariko ko Springbok izakomeza kurindira Sake na Goma mu birindiro biri ku rwego rwisumbuye bya MONUSCO.”
Uyu musirikare atanze iki cyizere mu gihe abarwanyi ba M23 bashinze ibirindiro mu bilometero bibarirwa muri 20 uvuye mu Mujyi wa Goma.
Abarwanyi ba M23 baherutse gufata agace ka Shasha na Kirotshe twegereye Ikiyaga cya Kivu, bafunga umuhanda uhuza santere ya Minova, Sake na Goma. Imirwano yahabereye yakomye mu nkokora ibikorwa by’ubucuruzi muri iki gice.
Ingabo za MONUSCO zifatanya n’iza RDC muri iyi ‘opération’ yitwa Springbok kuva mu ntangiriro za Ukuboza 2023, aho zatangiye zishinga ibirindiro bihuriweho mu gace ka Kimoka.
