Ese uyu munsi waturutse he?

Inkuru y’uyu itangira muri Leta Zunze Ubumwe za Amerika, mu kinyejana cya 20. 

Hari umugore witwaga Anna Jarvis, wakundaga nyina cyane. Nyina yari umugore w’inararibonye witwaga Ann Reeves Jarvis, wakoze cyane mu guharanira ubuzima n’uburenganzira bw’abagore, kubitaho mu gihe cy’intambara no kwigisha uko bakwiriye kurera neza. 

Nyuma y’urupfu rwa nyina mu 1905, Anna Jarvis yafashe umwanzuro wo gukomeza umurage we—atangiza ubukangurambaga bwo kugira umunsi wihariye wo gushimira ababyeyi b’abagore. Mu 1908, habaye ibirori bya mbere bya Mother’s Day muri West Virginia.

Yakomeje kotsa igitutu ubuyobozi kugeza ubwo, mu 1914, Perezida wa Amerika Woodrow Wilson yashyizeho ku mugaragaro ko icyumweru cya kabiri cya Gicurasi kiba ari Mother’s Day—umunsi w’ikiruhuko cy’igihugu.

Mother’s Day ntiwagarukiye aho—wafashe isi yose. Ibihugu byinshi byarawemeye, nubwo bitawizihiza ku munsi umwe. Nko mu Rwanda, nubwo utari umunsi wa Leta, abana benshi n’imiryango barawizihiza, bagaha impano ababyeyi, bakababwira amagambo meza, cyangwa bakabafasha imirimo.

Ubundi se uyu munsi usobanuye iki?

Mother’s Day si umunsi wo kugura indabo gusa. Ni umunsi wo kwibuka akamaro k’umubyeyi w’umugore:

            •          Ni we utwitaho tukiri mu nda.

            •          Ni we utwonsa, akaturera atagoheka.

            •          Ni we ujya aheka ibibazo byose bya buri wese mu muryango atavuze amagambo menshi.

            •          Ni umujyanama, inshuti, intwari, rimwe na rimwe akaba n’umuyobozi w’urugo.

Mother’s Day ni umunsi wo kumubwira ngo:“Mama, turagukunda. Turagushimira.” N’iyo yaba atakiriho, ni umunsi wo kumwibuka, ugashima ibyo yagukoreye. 

Ntibisaba umunsi umwe ngo ukunde umubyeyi ariko umunsi nk’uyu utwibutsa ko hari abantu badakwiye kwibagirana mu buzima bwacu aribo babyeyi bacu.