Champions League: Dortmund na Atlético Madrid zujuje amakipe azakina 1/4 cya UEFA Champions League
Champions League: Dortmund na Atlético Madrid zujuje amakipe azakina 1/4 cya UEFA Champions League
Borussia Dortmund na Atlético Madrid zitwaye neza mu mikino yo kwishyura ya 1/8 yabaye ku wa Gatatu, byatumye amakipe umunani yose azakina 1/4 cya UEFA Champions League amenyekana.
Ku kibuga cyayo mu Budage, Borussia Dortmund yageze muri 1/4 ku nshuro ya mbere mu myaka itatu ibikesha ibitego bya Jadon Sancho na Marco Reus mu mukino yari yakiriyemo PSV Eindhoven.
Ishoti rikomeye ryaterewe ahagana ku murongo w’urubuga rw’amahina na Jadon Sancho ku munota wa gatatu, ni ryo ryavuyemo igitego cya mbere hakiri kare.
Ikipe y’Umutoza Edin Terzić yatsinze igitego cya kabiri, ariko nticyemezwa nyuma y’uko bigaragaye ko Niclas Fullkrug yari yarariye.
Marco Reus wasimbuye Sancho ku munota wa 72 nyuma yo kuvunika, yatsinze igitego cyashimangiye intsinzi mu minota y’inyongera ubwo yari asigaranye n’Umunyezamu Walter Benitez.
PSV yari yabonye uburyo bwinshi bwari gutuma yishyura, burimo ubwabonywe na Hirving Lozano by’umwihariko ndetse na Luuk de Jong.
Iminota 90 n’indi y’inyongera yose yarangiye Borussia Dortmund yatsinze ibitego 2-0, ikomeza muri 1/4 ku giteranyo cy’ibitego 3-1 mu mikino yombi.
Undi mukino wabaye, muri Espagne, wasize Atlético Madrid ikomeje kuri penaliti 3-2 nyuma yo gutsinda Inter Milan ibitego 2-1, amakipe yombi akanganya 2-2 mu mikino ibiri.
Umunyezamu Jan Oblak yafashije ikipe ye gukomeza, akuramo penaliti ya Alexis Sanchez na Davy Klaassen mbere y’uko Lautaro Martinez atera indi hejuru y’izamu.
Muri uyu mukino, Dimarco yari yafunguye amazamu ku ruhande rwa Inter Milan ku munota wa 33, ariko Antoine Griezmann na Memphis Depay batsindira ikipe yabo ku wa 35 n’uwa 87, byatumye hashyirwaho indi minota 30 y’inyongera kuko umukino ubanza wari warangiye ari 1-0.
Tombola ya 1/4, iya 1/2 kugeza ku mukino wa nyuma iteganyijwe ku wa Gatanu, tariki ya 15 Werurwe guhera saa Saba.
Amakipe yageze muri iki cyiciro ni Atlético Madrid, Arsenal, FC Barcelone, Bayern Munich, Manchester City, Paris St-Germain, Real Madrid na Borussia Dortmund.
