Ni ibirori byitabiriwe na Guverineri w’Intara y’Amajyaruguru, Bwana Mugabowagahunde Mourice, Umuyobozi w’Akarere ka Gakenke, Madamu Mukandayisenga Vestine, Abahagarariye Urwego rw'Igihugu rushinzwe guteza imbere amashuri ya Tekiniki, Imyuga n'Ubumenyingiro (Rwanda TVET Board), inzego z’umutekano, abafatanyabikorwa b’iki kigo batandukanye n’inshuti z’abanyeshuri bahawe impamyabushobozi.

Guverineri w’Intara y’Amajyaruguru, Bwana Mugabowagahunde Mourice, yashimye ubuyobozi bw’iki kigo ku ruhare kigira mu guteza imbere uburezi, by’umwihariko ku mwana w’Umukobwa.

Yavuze ko amasomo aba bakobwa bize ari ingirakamaro ku isoko ry’Umurimo mu Rwanda, bizabafasha kuba ba rwiyemezamirimo n’abayobozi beza u Rwanda rukeneye.

Ati “Mwanabonye inyongera, mwiga kuba ba rwiyemezamirimo beza, Igihugu cyacu gikeneye, muhabwa n’uburere bukwiriye. Byose nitubishyira hamwe, sinshidikanya ko muje ku Isoko ry’umurimo koko mwiteguye.”

Umuyobozi w'Akarere, ka gakenke Madamu Mukandayisenga Vestine, yababwiye ko ihangamurimo bize bakwiye kuribyaza umusaruro, bijyanye n'amahirwe ubuyobozi bw'Igihugu bugenera abaturage, nabo bakazavamo ba rwiyemezamirimo bahanga imirimo ku bandi baturage.

Ati “Mwarize ariko nagira ngo mbabwire ko hanze aha hari n’amahirwe, inganda nyinshi zirahari ariko namwe mwahanga imirimo yanyu mugatanga imirimo ku bandi.”

Ni ku nshuro ya Kane ikigo Our Sisters’ Opportunities gitanze impamyabushobozi ku banyeshuri b'abakobwa, aho abasanga 400 bize ibijyanye no guhanga Imideli, ubudozi, kwihangira imirimo irimo iyo gukora amasabune n'Ikoranabuhanga abahabarangije, banafashwa no mu rugendo rwo gutangira imishinga ibyara inyungu.

Nyuma y'ibirori byo gutanga impamyabushobozi, habayeho umuhango wo gutaha ku mugaragaro inyubako y'amacumbi y'abanyeshuri ba oso_oursisters, yubatswe mu rwego rwo gufasha abaturuka kure, bagorwaga no kwiga bataha.

Abanyeshuri bari bafite ibyishimo

    Yanditswe na Nkurunziza Bonaventure