Aya marushanwa yatangijwe ku wa Gatanu tariki ya 16 Mutarama 2026. Mu turere twose tw'igihugu , iyi mikino yahise itangira hagamijwe gushaka abazaduhagararira.

Mu mikino izakinwa harimo umupira w’amaguru, Volleyball, Basketball, Imikino Ngororamubiri, Sitball, umukino w’Amagare ndetse no kubuguza.

Umuyobozi Mukuru ushinzwe Itumanaho muri MINALOC, Havugimana Joseph Curio, yabwiye itangazamakuru ko Minisiteri y’Ubutegetsi bw’Igihugu ishishikariza abaturage kwitabira aya marushanwa no kurushaho kwimakaza isuku aho batuye.

Ati “Iyi mikino igamije kwimakaza imiyoborere myiza mu gihugu no guteza imbere siporo binyuze ku kuzamura impano abaturage bifitemo. Tuzayitangiramo n’ubutumwa kandi by’umwihariko muri uyu mwaka tuzibanda ku gushishikariza abaturage kugira isuku hose.”

Havugimana yakomeje avuga ko nka MINALOC bashishikariza abaturage kwitabira iyi mikino haba mu kujya mu makipe y’aho batuye mu mirenge kugira ngo haboneke amakipe abageza ku ntsinzi.

Ati “N’abafite impamo baze bazerekane, tutibagiwe ko abasigaye na bo bagomba kuza gushyigikira no gufana amakipe yabo n’abakinnyi babahagarariye, kugira ngo bose bafatanye kugera ku byishimo biturutse kuri iyo ntsinzi iva ku ishyaka n’umurava bigaragara muri iri rushanwa.”

Bamwe mu bakinnyi bagiye kwitabira aya marushanwa bishimira ko bagiye kongera kugaragaza impano zabo, bamwe banagaragaza ko azabafasha mu kwishima no gusobanukirwa gahunda za Leta.

Diedonne (uzwi nka Dioko) Kapiteni w' ikipe y’Umurenge wa Base mu karere ka Rulindo uzakira umurenge wa Cyungo kuri uyu wa gatanu tariki ya 23/01/2025 , yabwiye umunyamakuru wa bigezweho tv ko nk’abantu baturuka mu byaro haba hari impano zapfukiranywe, ariko ko iyo babonye amahirwe y’iyi mikino bibafasha cyane.

Valens , we yabwiye umunyamakuru wa bigezweho tv ko iyi mikino igira uruhare mu gusakaza ubutumwa bahabwa n’ubuyobozi harimo kwirinda amakimbirane, ibiyobyabwenge, kwimakaza isuku n’ibindi byinshi.

Ati “Turashimira Umukuru w’Igihugu uburyo ahora adushakira iterambere n’imibereho myiza.”

Umukozi mu karere ka Rulindo ushinzwe siporo n'urubyiruko bwana Muvara Valens, waganiriye n'umunyamakuru wa bigezweho tv, yihanangirije amwe mu makipe ajya akora amanyanga agakinisha abakinnyi batemewe abibutsa ko iyi mikino igamije imiyoborere myiza ari na yo mpamvu nta muntu ukwiriye gukoramo amakosa.

Amarushanwa y’Umurenge Kagame Cup yatangiye mu 2006 yitwa ‘Amarushanwa y’Imiyoborere myiza’. Mu 2010 ni bwo yahinduriwe izina yitwa Umurenge Kagame Cup mu rwego rwo kugaragaza no gushimira Perezida wa Repubulika y’u Rwanda, Paul Kagame, uruhare rwe rukomeye mu miyoborere myiza n’inkunga atanga mu iterambere rya siporo mu Rwanda no mu Karere ruherereyemo.

Ikipe zabaye iza mbere mu mirenge zihurira ku rwego rw’akarere zikishakamo izihagararira izindi ku rwego rw'intara, ikipe zibaye izambere ku rwego rw'intara zihurira ku rwego rw’Igihugu ari naho habera imikino ya nyuma.

Yanditswe na nkurunziza Bonaventure