Impuguke nshya mu buvuzi n’igisirikare zigiye gufasha u Rwanda mu kurushaho kwigira.
Impuguke nshya mu buvuzi n’igisirikare zigiye gufasha u Rwanda mu kurushaho kwigira.
Ba Ofisiye 81 mu Ngabo z’u Rwanda, RDF bahawe impamyabumenyi y’Icyiciro cya Kabiri cya Kaminuza nyuma yo gusoza amasomo mu Ishuri Rikuru rya Gisirikare rya Gako, basabwe no guhangana n’ibibazo byugarije Isi birimo iby’ikoranabuhanga.
Ni impamyabumenyi bahawe kuri uyu wa Mbere, tariki 4 Kanama 2025, mu muhango wabereye mu Ishuri rikuru rya Gisirikare rya Gako riri mu Karere ka Bugesera muri gahunda yateguwe ku bufatanye na Kaminuza y’u Rwanda (UR).
Minisitiri w’Ingabo, Juvenal Marizamunda, ni we wayoboye ibi birori ari kumwe n’abayobozi barimo Umugaba Mukuru w’Ingabo z’u Rwanda, Gen Mubarakh Muganga, Umunyamabanga Mukuru mushya w’Urwego rw’Igihugu rw’Ubugenzacyaha (RIB), Col Pacifique Kayigamba Kabanda na Minisitiri w’Uburezi, Nsengimana Joseph.
Muri aba basoje amasomo barimo 20 bafite ipeti rya ‘Lieutenant’ bize Ubuvuzi n’abagera kuri 61 bafite ipeti rya ‘Sous-Lieutenant’ bize ibijyanye n’Ubuhanga mu bya Gisirikare n’Ubumenyamuntu.
Umuyobozi w’Ishuri Rikuru rya Gisirikare rya Gako, Brig Gen Franco Rutagengwa, yashimye umuhate w’abanyeshuri basoje amasomo yabo.
Yagize ati “Aba bakobwa n’abahungu bagaragaje ubuhanga budasanzwe mu masomo yabo. Bafite ubumenyi burimo ubusanzwe n’ubwa gisirikare ndetse bashobora guhangana n’ibibazo byugarije sosiyete.”
Brig Gen Franco Rutagengwa yibukije abasoje amasomo ko bakwiye gukomeza kurangwa n’indangagaciro ziranga umwuga wa gisirikare.
Ati “Twizeye ko muzakora inshingano zanyu mu bushishozi. Ubumenyi mwahawe ni intangiriro yo kubaka igisirikare gihamye, kubahiriza inshingano z’ubuyobozi no kurinda abaturage.”
Minisitiri w’Ingabo, Juvenal Marizamunda, yabwiye aba ba Ofisiye mu Ngabo z’u Rwanda basoje amasomo ko impuzankano yabo ishimangira icyizere cy’uburinzi bategerejweho n’abaturage.
Ati “Mu gihe muvuye hano, mufitiwe icyizere n’Igihugu cyose. […] Nk’abasirikare bigishijwe, muzirikane ko mwinjiye mu Isi ihinduka irimo ibibazo bishingiye ku bujura bw’ikoranabuhanga n’imihindagurikire y’ibihe. Uburezi mwahawe nizeye ko bwabateguriye guhangana n’ibibazo biri hanze aha.”
Minisitiri Marizamunda, yavuze ko igisirikare gihamye cyubakira ku bigishijwe neza, abatojwe neza kandi bafite ibikoresho bikwiye.
Ati “Ahazaza ni ahanyu, mukomeze mufite imbaraga n’intego, mukomeze guteza imbere Igihugu.”
Lt Dr Eugene Parfait Ruhirwa wize Ubuvuzi no Kubaga na ‘Sous Lieutenant’ Christian Izere wize n’Ubuhanga mu bya Gisirikare n’Ubumenyamuntu bahembwe nk’abanyeshuri bahize abandi mu basoje amasomo muri Kaminuza y’u Rwanda mu mwaka wa 2025.
Kuva mu 2015, Ishuri Rikuru rya Gisirikare rya Gako ryatangiye gufatanya na Kaminuza y’u Rwanda mu kwigisha amashami arimo Ubuhanga mu bya Gisirikare n’Ubumenyamuntu, Ubuvuzi n’Ubuhanga mu by’Ubukanishi n’Ingufu.
Kuva mu 2020, aya mashami yongeweho andi arimo Imibare, Ubugenge, Ibinyabuzima, Amategeko, Ubuforomo n’Ubuhanga mu by’Ubukanishi.
Minisitiri w’Ingabo, Juvenal Marizamunda, ni we wayoboye ibi birori ari kumwe n’abayobozi barimo Umugaba Mukuru w’Ingabo z’u Rwanda, Gen Mubarakh Muganga
Yanditswe na Henriette UWAMAHIRWE
