Ingabo za Repuburika Iharanira Demokarasi ya Congo zakoresheje indege na drone karabutaka mu kugaba ibitero bikomeye
Ingabo za Repuburika Iharanira Demokarasi ya Congo zakoresheje indege na drone karabutaka mu kugaba ibitero bikomeye
Buhoro buhoro inzira y’amahoro iragenda iganzwa n’intambara, Ihuriro AFC/M23 rirashinja ingabo za Leta ya Congo gukoresha indege z’intambara n’indege nto zitagira abapilote mu kugaba ibitero ahantu hatandukanye hagenzurwa na AFC/M23 muri Masisi.
Ibi bitero byagiye bivugwa n’ibitangazamakuru bitandukanye byo muri Congo, ndetse n’abanyamakuru batandakanye.
Kuri uyu wa Gatanu tariki 19 Nzeri, 2025 mu masaha ya mugitondo, ingabo za Congo zarashe ahitwa Bibwe, Nyenge, Chytso, Hembe no mu nkengero zaho.
Itangazo ryasohowe na AFC/M23 rivuga ko ibitero by’indege zirimo Sukhoi-25 na drone zo mu bwoko bwa CH-4, byishe abaturage b’abasivile.
Urubuga ACTUALITE.CD ruvuga ko ingabo za Congo, FARDC zarashe muri biriya bice.
Iki gitangazamakuru kivuga ko muri iki cyumweru harimo kuba imirwano ikomeye, aho inyeshyamba za AFC/M23 ziri cyane ahitwa Minjenje, Bibwe, Malemo na Mpety, mu gihe ingabo za leta zabashije gusubirana uduce turimo Katobi na Luola mu gace ka Kisimba muri Teritwari ya Walikale.
AFC/M23 ivuga ko ibyo bikorwa bya leta byarenze ku buhuza bugirwamo uruhare n’impande zitandukanye ndetse n’amasezerano yo kumvikana yasinyiwe i Doha.
Ihuriro AFC/M23 rivuga ko Umuryango Mpuzamahanga ukomeje kurebera ibikorwa bya FARDC, rikavuga ko rizakomeza kurinda abaturage no gusanga umwanzi aho akorera mu kugaba ibitero.
Kugeza ubu hari ibiganiro bibera i Doha muri Qatar aho intumwa za leta ziganira na AFC/M23 mu buryo bwo kugarura amahoro, cyakora bisa naho umusaruro wabyo uri kure.
