Israel nubwo iri muntambara itoroshye numutwe wa Hamas yemeje ko igiye kubaka inzu 3400 mu ntara ya West Bank
Israel nubwo iri muntambara itoroshye numutwe wa Hamas yemeje ko igiye kubaka inzu 3400 mu ntara ya West Bank
Leta ya Israel yatangaje ko iteganya kubaka inzu zisaga 3400 zo guturamo mu duce dutandukanye mu Ntara ya West Bank, ibintu umuryango mpuzamahanga uvuga ko byaba binyuranyije n’amategeko mpuzamahanga.
Agace ka West Bank ni imwe mu mvano y’amakimbirane hagati ya Israel na Palestine kuva Israel, kuko buri gihugu kivuga ko ari akacyo, bikaba bifatwa nk’ubushotoranyi kuba hari igihugu cyakomeza kubwubakaho mu gihe ayo makimbirane atarahoshwa.
Ikinyamakuru Haaretz cyo muri Israel kivuga ko iyo Leta yamaze kunoza igenamigambi rijyanye no kubaka inzu 3.476 muri West Bank, 2.452 muri zo zizubakwa muri Maale Adumim naho 694 zizubakwe muri Efrat, mu gihe 330 zizubakwa muri Kedar.
Minisitiri w’Imari wa Israel, Bezalel Smotrich, yatangarije ku rukuta rwe rwa X (iyahoze ari twitter) ko hashize umwaka urenga hemejwe ko hazubakwa inzu zigera ku 18,515 muri West Bank.
Yagize ati “Abanzi bagerageza kutugirira nabi no kuduca intege ariko tuzakomeza kubaka no kwiyubakira kuri ubu butaka,”
Ibi Minisitiri Smotrich abitangaje nyuma y’uko ku itariki ya 22 Gashyantare Abanya-Palestine bitwaje intwaro bamashe urufaya rw’amasasu ku modoka zarimo Abanya-Israel bakicamo umwe, abandi bagakomereka.
Minisitiri w’Ububanyi n’Amahanga mu butegetsi bwa Palestine bw’agace ka West Bank, yavuze ko iki gikorwa nta shingiro gifite mu mashyi no mu mudiho ahubwo ko cyakongera ibikorwa by’urugomo n’intambara.
Umunyamabanga wa Leta wa Amerika, Antony Blinken, yavuze ko batishimiye icyo cyemezo cya Israel avuga ko Leta Zunze Ubumwe za Amerika zibifata nk’ibitemewe n’amategeko.
Ati “Ni politiki y’igihe kirekire ya Amerika haba ku butegetsi bw’Aba-Républicain n’Aba-Démocrate yo kudashyikira kubaka inzu nshya z’imiturire muri aka gace kuko bibangamiye inzira y’amahoro […] Twe tubona ari uguca intege aho gukomeza umutekano wa Israel,”
Israel imaze kubaka inzu zisaga 160 zatuwemo n’Abayahudi basaga 700.000 kuva yakwigarurira West Bank n’u Burasirazuba bwa Yeruzalemu, nyuma y’intambara yo mu Burasirazuba bwo Hagati mu 1967, ubutaka Palestine ikivuga ko ari ubwayo.
