KNC yanenze abagabo b’iki gihe batunzwe n’abagore barangiza bakigira intakoreka
KNC yanenze bikomeye abagabo batunzwe n’abagore babo bagahitamo ubusinzi n’ubwomanzi aho gushaka akazi. Yaburiye abakobwa ko bazahura n’abasore bazageza n’aho kubibira "cotex" ngo babone ay’inzoga.
Umunyamakuru Kakoza Nkuriza Charles, uzwi nka KNC, yashize amanga maze anenga imyitwarire y’amashyushyu igenda yuburira mu bagabo b’iki gihe, basigaye bicarira duke tw’abagore babo hanyuma bagasindira n’utwo babonye.
Mu kiganiro "Rirarashe" gica kuri Radio na Tv1, KNC ari kumwe na Angelibert Mutabaruka, bagaragaje ko umuco w’ubugabo uri gukendera, aho usanga abasore n’abagabo basigaye barangwa n’ubunebwe n’ubuzima bw’uburyarya.
"Niba umugore agutunze, mwubahe"
KNC yagaragaje ko ari ishyano kubona umugabo utungwa n’umugore we, ariko yagera mu rugo akishongora ndetse agasinda, aho kugaragaza imico myiza n’ubwuzuzanye.
"Ni byiza ko umugore ashobora kugutunga, ariko niba umugore arimo gukora, gerageza ugaragaze imico myiza nk’umugabo. Burya niba umugore akora agutunze, mwubahe. Ibaze umugore yagiye kwirirwa aca inshuro, agataha agasanga wanasinze! Uwo mugabo aba ari mugabo nyabaki?" — KNC.
Ubutumwa ku rubyiruko n'abakobwa
KNC ntiyaripfana, kuko yageze n’aho aburira abakobwa b’iki gihe ko bagiye guhura n’abahungu "basekeje" barangwa n’ubunebwe n’ubwomanzi, kugeza n’aho bazajya babibira ibikoresho by’isuku (cotex) kugira ngo babigurishe babone ay’inzoga.
Yibajije ku miterere y’abahungu b’ubu bamara amasaha mu nzu zitunganya imisatsi (salon), bafite udukapu twuzuyemo ibirungo by’ubwiza (makeup), mu gihe bakwiye kuba bashakisha imirimo ituma bagira ijambo mu rugo.
"Akazi ntabwo kabuze"
Angelibert Mutabaruka yashimangiye ko nta rwitwazo rw’uko akazi kabuze ruriho. Yagaragaje ko umugabo ufite intege n’ubugabo akwiye kwitabira n’imirimo iciriritse nko kubaka, guhereza amatafari cyangwa kuvanga umucanga, kugira ngo atataha amara masa mu rugo rwe.
Ibi biganiro bya KNC na Mutabaruka bikomeje guca amaremare ku bibazo by’imibereho n’umuco mu muryango nyarwanda muri uyu mwaka wa 2026, aho basaba abagabo kugaruka ku nshingano zabo z’ibanze.
