Ikigo cy’Igihugu cy’Iteganyagihe, Meteo Rwanda, cyatangaje ko mu kwezi kwa Nzeri 2025, hateganyijwe imvura iri hejuru y’ikigero cy’impuzandengo y’imvura yari isanzwe igwa muri uko kwezi.
Ni ibikubiye mu nyandiko y’iteganyagihe ry’ukwezi kwa Nzeri, iki kigo cyasohoye.
Meteo Rwanda yavuze ko imvura iteganyijwe iri hagati ya milimetero 35 na 230, impuzandengo y’isanzwe igwa mu kwezi kwa Nzeri yari iri hagati ya milimetero 35 na 200.
Meteo Rwanda iti “Mu gice cya mbere n’icya gatatu hateganyijwe imvura iri ku kigero cy’isanzwe igwa naho mu gice cya kabiri hateganyijwe imvura iri hejuru y’isanzwe igwa muri icyo gice.”
Ivuga ko imvura iri hagati ya milimetero 195 na 230 ari yo nyinshi iteganyijwe muri uku kwezi kwa Nzeri, ikaba iteganyijwe mu Turere twa Rusizi, Nyamasheke, Rutsiro na Rubavu, mu Turere twa Karongi, Nyabihu na Musanze uretse uburasirazuba bwatwo, ibice byo hagati n’amajyaruguru by’Akarere ka Burera, uburengerazuba bw’Uturere twa Ngororero, Nyamagabe na Nyaruguru.
Imvura iri hagati ya milimetero 155 na 195 iteganyijwe mu Turere twa Muhanga, Gakenke na Rulindo, amajyaruguru y’Akarere ka Gicumbi, mu bice by’amajyaruguru n’iby’uburengerazuba by’Uturere twa Kamonyi, Ruhango na Nyanza, ibice byo hagati by’Akarere ka Nyaruguru ndetse n’ahasigaye mu Turere twa Burera, Musanze, Nyabihu, Ngororero, Karongi na Nyamagabe.
Ibipimo bya Meteo Rwanda bigaragaza ko kandi ubushyuhe bwo hejuru buteganyijwe ku manywa buzaba buri hagati ya dogere Selisiyusi 18 na 32, naho ubushyuhe bwo hasi buteganyijwe nijoro buzaba buri hagati ya dogere Selisiyusi 6 na 16, naho umuyaga uringaniye ushyira kuba mwinshi, ufite umuvuduko uri hagati ya metero 4 na metero 12 ku isegonda niwo uteganyijwe muri muri Nzeri.
Meteo Rwanda yasabye abantu kuzaba maso kuko ingaruka ziterwa n’umuyaga mwinshi ndetse n’inkuba ziteganyijwe mu bice bitandukanye by’Igihugu.
