Ibi Minisitiri yabigarutseho kuri uyu wa Gatatu tariki 17 Nzeri 2025, mu Kiganiro yagiranye na Radio TV10 agaruka kuri byinshi bijyanye n'iri siganwa ry'Amagare ry'isi rizabera hano mu Rwanda guhera tariki 21 kugeza 28 Nzeri 2025.

Minisitiri yatangaje ko muri iyi shampiyona y'isi izaba irimo agashya gakomeye kuko ni ubwa mbere gusiganwa n'ibihe bizaba bigiye kubera ahantu hafunze kuko ubusanzwe bibera mu muhanda.

Yagize ati " Ni ubwa mbere gusiganwa n'ibihe bigiye gutangirira ahantu mu nzu cyangwa ahantu hafunze, ubundi byajyaga bibera ahantu mu muhanda. Ibi byatumye tugaragaza n'ibindi bikorwaremezo bya Siporo dufite kandi biteye imbere nka BK Arena." Abajijwe uko bizaba bimeze yavuze ko abafana bashonje bahishiwe.

Minisitiri wa Siporo, Nelly Mukazayire yanatangaje ibintu bitatu bizatuma u Rwanda rugaragara neza ko iyi shampiyona y'isi y'Amagare izaba yagenze neza. Avuga ko Imyiteguro, abasiganwa ndetse n'abafana ari byo bizagaragaza ko u Rwanda rwabikoze neza.

Yagize ati "Imyiteguro yagenze neza. Icya Kabiri ni abitabiriye iri siganwa, abaje kurushanwa. Uyu munsi dufite ibyamamare bya mbere ku isi. Icya Gatatu ni abafana, uko bazaba bafana ndetse n'uko bazaba bishimye. Niyo mpamvu nshishikariza abafana bagenzi banjye tuzabe tuhibereye."

Ubusanzwe ibirori nk'ibi bigira icyo bisigira abenegihugu, kuba bigiye kubera mu Rwanda hari ibyo benshi bazinjiza mu buryo bufatika ndetse n'igihugu muri rusange.

Iki kintu Minisitiri wa Siporo Nelly Mukazayire yakigarutseho yemeza ko abanyarwanda bazinjiza mu buryo bufatika ariko kandi igihugu ubwacyo bizatuma kigira andi mahirwe atandukanye.

Yagize ati " Icyo kwinjiza harimo ikijyanye n'igihugu cye nk'umunyarwanda. U Rwanda aho duhagaze, aho tugeze kuba tubashije kwakira iri rushanwa hari andi mahirwe menshi cyane bigenda bizaba no mu bindi bikorwa bitandukanye. Icya Kabiri, mu buryo bufatika harimo ibyo bikorwa by'ubucuruzi bizakorwa.

Uyu munsi dufite abantu barenga ibihumbi 5, bazaza kureba iri rushanwa no kuryitabira. Abazaba muri Hotel, aho bazaba bari, ibyo bikorwa byose n'ibizabasha kwinjiza. Ntabwo icyo kwinjiza wakirebera mu mafaranga y'ako kanya gusa kuko hari n'ibindi nka Siporo tuzinjiza muri ibyo bintu byose."

Muri iri siganwa ry'Amagare ku isi, harimo n'abakinnyi b'abanyarwanda ndetse bemeza ko biteguye kuzitwara neza. U Rwanda muri iri siganwa ruzaba rufite abakinnyi 25.

Minisitiri yatangaje ko aba bakinnyi barimo kwitegura neza cyane aho bari mu Bugesera, ndetse Kandi ko bafite ibikoresho byose bakeneye birimo amagare ari ku rwego rw'iri siganwa.

Muri aba bakinnyi harimo abakinnyi 8 b'abagabo harimo 6 bazitabira mu cyiciro cy'abagore ndetse harimo n'abazitabira mu batarengeje imyaka 23. Iri rushanwa rizaba ku bari munsi y'imyaka 23, ni ubwa mbere rigiye kuba mu cyiciro cy'abagore, bivuze ko ari undi mwihariko.

Nelly Mukazayire yagarutse kandi kuri Formula 1 u Rwanda rwifuza kwakira muri 2026, yemeza ko bagitegereje umwanzuro nyuma y'ikiganiro ariko kandi hari icyizere ko naryo rizabera hano mu Rwanda.

Yagize ati "U Rwanda rwamaze kugaragaza ko rubishaka. Ubu ibiganiro birimo birakorwa n'abashinzwe gutegura Formula 1 Kandi birimo biragenda neza. Icyizere kirahari. Ntabwo igihugu kiyemeje ko bizakunda ngo ntibizakunde."

   Yanditswe na Nkurunziza Bonaventure