Muri Kaminuza byakomeye "Abize muri Kaminuza Gatolika y’u Rwanda bashakaga guhabwa impamyabumenyi bakuriwe inzira ku murima"
Muri Kaminuza byakomeye "Abize muri Kaminuza Gatolika y’u Rwanda bashakaga guhabwa impamyabumenyi bakuriwe inzira ku murima"
Inteko Ishinga Amategeko umutwe w’Abadepite yafashe icyemezo cy’uko abanyeshuri bane bize muri Kaminuza Gatolika y’u Rwanda ntibagaragare ku rutonde rw’abasoje amasomo byari bifite ishingiro, kuko bigaragara ko batari baratsinze amasomo abiri y’ingenzi asabwa ngo umuntu yemererwe kwiga muri kaminuza.
Abandikiye Inteko Ishinga Amategeko ni bane mu barenga 24 batangiye kwiga muri Kaminuza Gatolika y’u Rwanda (CUR) kuva mu 2016 kugeza mu 2021, biga mu ishami rya ‘Public Health and Human Nutrition’ ariko mu gihe cyo gusoza amasomo ntibisanga ku rutonde rw’abagomba guhabwa impamyabumenyi.
Aba banyeshuri bitabaje inteko Ishinga Amategeko umutwe w’Abadepite ngo barenganurwe, bahabwe impamyabumenyi bigiye. Basoje amashuri yisumbuye hagati ya 2001 na 2005.
Mu biganiro bagiranye na Komisiyo y’Uburezi, Ikoranabuhanga, Umuco n’Urubyiruko mu mutwe w’Abadepite, bagaragaje ko mu myigire yabo nta kibazo bigeze bagaragarizwa kijyanye no kutuzuza ibisabwa, kugeza igihe basoreje amasomo bakajya kwimenyereza umwuga mu bigo nderabuzima bitandukanye.
Mu 2021 aba banyeshuri ntibisanze ku rutonde rw’abagomba guhabwa impamyabumenyi, babwirwa ko bize bataratsinze amasomo abiri y’ingenzi.
Perezida w’iyi Komisiyo, Uwamariya Vénéranda yatangaje ko ibiganiro bagiranye n’Inama Nkuru Ishinzwe Amashuri Makuru (HEC), byerekanye ko aba banyeshuri batatsinze amasomo abiri y’ingenzi yagombaga kubemerera kwiga muri kaminuza.
Yagaragaje ko CUR yemera ko hari abandi banyeshuri bari bafite ikibazo nk’iki bakagirwa inama yo kujya gukora ibizamini bya Leta nk’abakandida bigenga, amasomo basabwaga bamaze kuyatsinda bashyirwa ku rutonde rw’abasoje amasomo bahabwa impamyabumenyi zabo.
Depite Muhakwa Valens yagaragaje ko ikibazo gikomeye akibona kuri aba banyeshuri batatsinze amasomo akenewe, asaba ko bagirwa inama bakuzuza ibisabwa kuko mu gihe batabikoze badakwiye guhabwa izi mpamabumenyi.
Ati “Umuzi wo gukemura iki kibazo uri kuri aba banyeshuri, igihe bazaba bujuje ibisabwa nta kizababuza guhabwa dipolome zabo. Numva mu gusubiza aba banyeshuri banagirwa inama, ntibigarukire ku kubamenyesha ko batujuje ibisabwa, bakagirwa inama yo kunyura mu nzira ziteganyijwe n’amabwiriza.”
Kaminuza Gatolika y’u Rwanda yahawe ibihano by’ubutegetsi kubera kwakira abanyeshuri batujuje ibisabwa ariko iniyemeza ko umunyeshuri muri aba uzajya yifuza kujya gukora ibizamini kugira ngo atsinde amasomo abiri amwemerera kwiga iryo shami izajya yirengera ikiguzi cyabyo, yazana impamyabumenyi y’amashuri yisumbuye igaragaza ko yatsinze, agahita ashyirwa ku rutonde rw’abahabwa impamyabumenyi ya kaminuza.
Kugeza ubu hari abandi banyeshuri babiri bamaze gukora ibizamini ndetse bari ku rutonde rw’abazahabwa impamyabumenyi mu minsi iri imbere.
Hari uwize iya kure basanze yarize muri Kaminuza itemewe
Mu basabye Abadepite kurenganurwa kandi harimo umuturage wo mu karere ka Nyagatare witwa Habineza Leonard Uvuga ko yize muri Cambridge International College yo mu Bwongereza akoresheje iya kure, ahakura impamyabumenyi ya ‘Executive Business Administration’.
Uyu mugabo ngo yagannye HEC ashaka ‘equivalence’ ya A0 [impamyabumenyi y’icyiciro cya kabiri cya kaminuza] ariko abwirwa ko yize mu ishuri ridafite uburenganzira bwo gukora butangwa n’urwego rwa Leta mu gihugu ikoreramo.
Mu busesenguzi bwa Komisiyo y’Uburezi, Ikoranabuhanga, Umuco n’Urubyiruko, yasanze iyi kamunuza Habineza Leonard yizemo idafite uburenganzira bwo gukora bwatazwe n’urwego rwa Leta, bityo yanzura ko icyemezo cyafashwe cyo kutamuha equivalence gifite ishingiro.
Perezida w’iyi Komisiyo Uwamariya Vénéranda ati “Turebye n’amasomo yize ni amasomo make, amasomo umunani ugereranyije na dipolome yashakaga ko bamuhera equivalence.”
Gusa Depite Frank Habimeza yifashe ku itama, yavuze ko atunguwe no kumva bavuga ko iyi kaminuza itemewe nyamara imaze igihe kinini yigisha.
Ati “Nsabye ijambo kuko iri shuri ndizi, ndetse na hano Cambridge narahasuye, rimaze igihe kinini cyane rikora ndetse ritanga ibyangombwa bitandukanye, nkaba ntunguwe no kumva y’uko bavuze ko risa n’aho ritemewe kandi hari benshi cyane b’Abanyarwanda n’abandi bantu benshi nzi bahize bafite n’ibyangombwa byaho, …birantunguye.”
Yasubijwe ko Ikigo cya Leta y’u Bwongereza gishinzwe kwemeza no kugereranya impamyabumenyi gikorana na HEC kugira ngo imenye amakuru kuri za Kaminuza, kandi ngo ikigo cyagaragaje ko ifite uburenganzira bwo gukora nticyemewe na Leta y’u Bwongereza.
