Abaturage bongeye kwibutswa ko bakwiye kwirinda kunywa ibi binyobwa bitujuje ubuziranenge kuko usibye kuba byagutera uburwayi butandukanye biba n’intandaro y’umutekano muke n’urugomo mu babikoresha.

Umuvugizi wa Polisi mu Ntara y’amajyaruguru ,inspector of police (IP) lgnace Ngirabakunzi asaba abaturage gukomeza gufatanya n’inzego mu kurwanya ibi binyobwa bitujuje ubuziranenge kuko kubikoresha bigira ingaruka nyinshi bityo kurwanya ababikora ni umusanzu wa buri wese.

Ati “Amakuru twamenye n’uko ababikora bo badashobora kubinywa cyangwa ngo babihe abana babo kubera ko bazi ingaruka zabyo. None n’iba abakora ibyo binyobwa birinda kubinywa kuko bitujuje ubuziranenge, abandi baturage bo batinyuka b'ate? Twese dukwiye kumenya ububi bwabyo, tukabirwanya kugeza bicitse.”

“Gahunda ni ugukomeza ibikorwa nk’ibi byo guca intege abakora ibi binyobwa bitujuje ubuziranenge, ariko n'abaturage bakumva ko bafite inshingano zo kwirinda kuko iyo babinyweye aribo bigiraho ingaruka bwa mbere.”

Polisi y’u Rwanda yongeye kwibutsa abo mu bice binywererwamo ibinyobwa nka muriture n’ibindi bitujuje ubuziranenge usanga higanza ibyaha by’urugomo n’amakimbirane mu miryango bityo abaturage bagasabwa kubyamaganira kure.

“By’umwihariko muri ibi bihe twizihiza iminsi mikuru isoza umwaka, abantu birinde ko ibi binyobwa bitujuje ubuziranenge bibabera inkomyi mu kunezerwa kandi batekanye.”

Abafashwe barashyikirizwa inzego zibishinzwe zibagire inama yo kubireka ndetse zinabace amande nk’uko amategeko abiteganya

Yanditswe na Nkurunziza Bonaventure