Polisi y’u Rwanda (Rwanda National Police) ku bufatanye n’Urwego rw’Ubugenzacyaha (Rwanda Investigation Bureau) batangaje ko bataye muri yombi abantu batandatu bakekwaho gukora uburiganya bwo gushuka urubyiruko babizeza amahirwe yo kujya kwiga mu gihugu cya Canada.

Ibi byabaye ku wa 13 Gicurasi 2026, nyuma y’uko mu Mujyi wa Kigali hagaragaye abantu benshi cyane bateraniye ahantu hamwe bashaka amakuru y’ayo mahirwe yo kujya kwiga hanze. Icyakora, bagezeyo basanga nta bahagarariye ibigo by’amashuri byo muri Canada bari bahari nk’uko byari byitezwe, bikaba byarakomeje gukemangwa ko ari gahunda y’uburiganya.

Polisi ivuga ko abafashwe bari kubazwa kugira ngo hakorwe iperereza ryimbitse rigamije kumenya ukuri ku by’iki gikorwa, uburyo cyateguwe, n’abantu bose bashobora kuba bari inyuma yacyo.

Umuvugizi wa Polisi y’u Rwanda, ACP Boniface Rutikanga, yavuze ko hakiri kugenzurwa niba aba bantu bafite ibyangombwa bibemerera guhagararira ibigo by’amashuri byo mu mahanga cyangwa niba barakoraga mu buryo butemewe n’amategeko.

Yagize ati: “Ni ukureba niba MINEDUC ibazi, ese Ambasade ya Canada irabazi, ese kaminuza n’ayo mashuri bavuga ko bahagarariye birabazi, ese bafite ibyo byangombwa bibemerera guhagararira ibyo bigo mu Rwanda?”

Yongeyeho ko ari ngombwa gusuzuma neza uburyo iyi mirimo ikorwa mu buryo bwemewe n’amategeko, kuko hari inzira zisabwa n’inzego zibishinzwe kugira ngo umuntu yemererwe guhagararira ibigo by’amashuri byo mu mahanga mu Rwanda.

Urubyiruko rwasabwe kwitonda

Abayobozi b’inzego z’umutekano basabye abaturage, by’umwihariko urubyiruko, kujya bitonda ku bantu babizeza amahirwe yihuse yo kujya kwiga cyangwa gukora mu mahanga, cyane cyane iyo basabwa amafaranga mbere y’uko bagira amakuru ahagije.

Bavuze ko ari ingenzi kugenzura niba gahunda nk’izo zifite uburenganzira bw’inzego za Leta, Ambasade z’ibihugu birebwa, ndetse n’ibigo by’amashuri bivugwa.

Ibi bibaye mu gihe mu bihe byashize hari hamaze kugaragara ibindi bikorwa bisa n’ibi, aho abantu bashukaga urubyiruko babizeza amahirwe yo kwitabira inama cyangwa kujya mu mahanga, nyuma bikaza kugaragara ko ari uburiganya.

Mu 2019, hari urubyiruko rwinjiye mu nama rwari rwasabwe amafaranga yo kwiyandikisha, nyuma basanga ibyo bari barijejwe atari ukuri. Icyo gihe inzego z’umutekano zatangaje ko zafashe ingamba zo gukurikirana abari inyuma y’ubwo buriganya no gusubiza amafaranga abaturage.

Ubugenzuzi burakomeje

Polisi ivuga ko iperereza rikomeje kandi ko ibisobanuro birambuye bizatangazwa nyuma yo gusesengura ibimenyetso byose n’ibyatangajwe n’abafashwe.

Izi nzego zijeje abaturage ko zizakomeza kurwanya ibikorwa by’uburiganya bikomeje kugaragara mu bijyanye no gushuka abantu babizeza amahirwe y’akazi cyangwa kwiga mu mahanga mu buryo