RDC: Perezida Tshisekedi yaciye amarenga ko Cardinal Ambongo ashobora gufungwa
Perezida wa Repubulika Iharanira Demokarasi ya Congo, Félix Tshisekedi Tshilombo, yaciye amarenga ko Arikiyepisikopi Gatolika wa Kinshasa, Cardinal Fridolin Ambongo, ashobora gufungwa.
Mu mpera za Mata 2024, Ubushinjacyaha bwa RDC bwatangiye iperereza ku magambo Cardinal Ambongo yavuze ku ntambara ingabo z’igihugu cye zihanganyemo n’umutwe witwaje intwaro wa M23.
Cardinal Ambongo yagaragaje ko kuba abarwanyi ba M23 bareguye intwaro, ari uko bari bagamije kwirindira umutekano kuko ingabo z’igihugu cyabo zitashoboye kubarinda. Yanenze kuba Leta ya RDC yarahisemo guha FDLR intwaro, yibwira ko izayifasha gutsinda uyu mutwe, nyamara ikaba ikomeje gutsindwa.
Yagize ati “Ibi biterwa n’uko Leta yahaye intwaro imitwe itandukanye nka Wazalendo n’abagize FDLR, yibwira ko izayifasha gusubiza inyuma M23. Iyi mitwe ifite intwaro zihagije kandi abaturage ni bo bari kwishyura ikiguzi cy’umutekano wazambye.”
Mu kiganiro na Le Figaro cyabereye mu Bufaransa kuri uyu wa 2 Gicurasi 2024, Tshisekedi yatangaje ko Cardinal Ambongo yatangaje ikinyoma nk’umunyamakuru Stanis Bujakera wagaragaje uruhare rwa Leta ya RDC mu rupfu rwa Chérubin Okende wabaye Minisitiri w’Ubwikorezi.
Uyu munyamakuru yatawe muri yombi tariki ya Nzeri 2023 hashize amezi abiri Okende yishwe, afungurwa tariki ya 19 Werurwe 2024 ubwo yari arangije igifungo cy’amezi atandatu yakatiwe. Ubushinjacyaha bwari bwaramusabiye gufungwa imyaka 20, bumushinja guhimba no gutangaza inyandiko yerekeye ku iperereza.
Perezida Tshisekedi yatangaje ko uyu munyamakuru yakurikiranwe n’ubutabera, azira “kuvuga ibinyoma bisebanya”, asobanura ko byabaye kubera ko atari hejuru y’itegeko. Ati “Umunyamakuru ntari hejuru y’itegeko, cyo kimwe na Arikiyepisikopi wa Kinshasa, Cardinal Ambongo.”
Uyu Mukuru w’Igihugu yavuze ko Cardinal Ambongo “yabaye umucengezamatwara w’u Rwanda, avuga ko RDC iri guha intwaro umutwe wa FDLR w’Abahutu. Ariko nabyerekane. Ntabwo ubwisanzure bwo kuvuga bukwiye kwifashishwa mu gutangaza ibinyoma, n’iyo waba uri Cardinal.”
Nubwo Tshisekedi yavuze ko Cardinal yatangaje ibinyoma, Umugaba Mukuru w’ingabo za RDC, Gen Christian Tshiwewe, yigeze kugaragaza ko abasirikare ayoboye bakorana na FDLR. Muri ‘Télégramme’ yo mu mpera za 2023, uyu musirikare yategetse bose guhagarika ubufatanye n’uyu mutwe, nyuma yo gushyirwaho igitutu na Leta Zunze Ubumwe za Amerika, gusa ntibyubahirijwe.
Abanyapolitiki batavuga rumwe n’ubutegetsi baherutse kwamagana iperereza Cardinal Ambongo ari gukorwaho, bagaragaza ko Abanye-Congo benshi bemeranya na we ku byo yavuze kuri iyi ntambara ibera mu burasirazuba.
Mu gihe urwego rw’ubutabera rukoreshwa n’abanyabubasha mu nyungu zabo bwite, nk’uko Cardinal Ambongo yabivugiye mu gitaramo cya Pasika muri Werurwe 2024, biba bigoye ko uwahamijwe icyaha na Perezida Tshisekedi ashobora kurokoka iri perereza.
