Minisiteri y’Uburezi n’iy’Ikoranabuhanga na Inovasiyo [MINICT] hamwe n’ibindi bigo birimo n’icy’u Budage cy’Iterambere, GIZ, byatangije gahunda igamije kwimakaza imikoreshereze ya robot mu mashuri uhereye mu ay’abanza ‘National Robotics Program’.
Binyuze muri iyi gahunda, abarimu bazajya bifashisha robots zubakanye ikoranabuhanga, mu kwigisha abanyeshuri amasomo basanzwe bakurikirana.
Ni nyuma y’uko bigaragaye ko robots zikoreshejwe mu myigishirize byoroha kwigisha amasomo ya siyansi, ikoranabuhanga n’imibare [STEM] kuko abanyeshuri babyiga bishimye, akabafasha mu kuzamura ubushobozi bwo gutekereza mu bwisanzure no guhanga ibishya.
Ikindi kandi izi robots zibabera nk’imfashanyigisho ku buryo bimwe biga mu magambo babasha kubyikorera, ku buryo biga binyuze mu gukora, bagasesengurana ubushishozi ibintu barebesha amaso kandi bashobora no gukoraho.
Iyi gahunda izaba iri mu nshingano za Mineduc, ikurikiranwa umunsi ku wundi n’Ikigo cy’Igihugu cy’Uburezi, REB, n’Urwego rw’Igihugu rushinzwe guteza imbere Imyuga n’Ubumenyingiro RTB.
Yatangijwe ku mugaragaro kuri uyu wa Gatanu ku ya 15 Werurwe 2024 na Minisitiri w’Ikoranabuhanga na Inovasiyo, Ingabire Musoni Paula na Minisitiri w’Uburezi, Twagirayezu Gaspard mu birori byari byitabiriwe n’abarimo Ambasaderi w’Umuryango w’Ubumwe bw’u Burayi, Belén Calvo Uyarra.
Byari byitabiriwe kandi na Chargé d’Affaires muri Ambasade y’u Budage mu Rwanda, Primus Peter; Norman Schraepel ushinzwe ibikorwa by’ikoranabuhanga muri GIZ Rwanda n’abandi bagiye baturuka mu bigo bitandukanye.
Mu gutangiza iyi gahunda, Minisitiri Ingabire Musoni Paula yavuze ko iki cyemezo cyafashwe binyuze mu bufatanye na Minisiteri y’Uburezi nyuma yo kubona ko bikwiye ko abanyeshuri batangira guhura no kumenya byimbitse imikorere ya za robots no kwimenyereza ibijyanye n’ikoranabuhanga ry’ubwenge bw’ubukorano dore ko biri mu by’ibanze bikenewe muri ibi bihe by’impinduramatwara ya kane mu by’inganda.
Twagirayezu yavuze ko iyi gahunda igambiriye guha umunyeshuri ubushobozi bwo gukemura ibibazo ahura na byo mu buzima, yifashishije ikoranabuhanga ryo mu bihe bigezweho.
Ati “Ndatekereza ni ibi twagakwiye kuba dukora tugahuriza hamwe abantu, kugira ngo dukore uko dushoboye abanyeshuri bacu babone ibikoresho bibafasha kubona ubumenyi buhagije mu byo biga.”
“Mu Rwanda tujya tuvuga ko abantu ariwo mutungo dufite, icyo dufite gukora rero ni ukongerera ubushobozi abantu bacu kandi uburezi ni ingenzi cyane.”
Ku ikubitiro ibigo bitanu bizobereye mu bijyanye n’ikoranabuhanga ry’ama-robots, byahawe umukoro wo gutegura ibimeze nk’imfashanyigisho zizajya zifashishwa n’abarimu mu mashuri ubwo bazajya baba bigisha amasomo atandukanye.
Ni ukuvuga ko bagomba gukora ikoranabuhanga rya robot rikemura ibibazo mu myigire n’imyigishirize y’isomo runaka.
Ibigo bibiri byahawe gutunganya ikoranabuhanaga rizajya rifasha mu kwigisha amasomo ajyanye n’ikoreshwa rya internet mu bindi bikoresho [Internet of Things- IoT], n’irindi rya robots zigaragaza uburyo habaho gushyushya no gukonjesha [Heating, Ventilation and Air Condtining- HVAC]. Iri rikazajya ryifashishwa mu mashuri y’abiga mu myaka ya gatatu n’iya kane mu bijyanye na Electrical Technology na ICT Networking.
Harimo kandi icyahawe kwita ku kubaka ikoranabuhanga rya robots, ryafasha abanyeshuri biga mu yisumbuye ibijyanye na siyansi, ikindi gihabwa gukora ikoranabuhanga rizafasha abanyeshuri mu myaka ya mbere n’iya kabiri mu yisumbuye rijyanye na ICT, ikindi gihabwa umwihariko wo kwita ku ikoranabuhanga ryafasha abana biga mu ya kane na gatanu y’amashuri abanza, rijyanye no kwiga kurema [making], amashanyarazi, n’ibindi.
Norman Schraepel ushinzwe iby’ikoranabuhanga muri GIZ Rwanda, yavuze ko ari intambwe yo kwishimirwa, ariko nanone hakiri urugendo mu myaka iri imbere.
Ati “Twatekereje iyi gahunda ko yaba ari nk’igerageza, ariko ntibikwiye ahubwo dukwiye kwiyemeza iyi gahunda ikagera kure hashoboka mu gihugu hose kandi bizagerwaho binyuze mu bufatanye. Twese niduhuza imbaraga tuzagera ku bikomeye kubera iyi gahunda.”
Biteganyijwe ko mu mezi atatu, ibi bigo bizaba byamaze gutunganya ikoranabuhanga ry’ama-robots bifite mu nshingano, hanyuma habeho umwanya wo guhugura abarimu ku mikoreshereze yaryo, maze nabo baryifashishe basobanura amasomo yabo mu mashuri.
Byitezwe ko iyi gahunda ubwo izaba yatangiye gukoreshwa mu mashuri, izahera mu bigo by’amashuri 15 hirya no hino mu gihugu, aho bwa mbere abanyeshuri barenga 500 aribo bazayungukiramo.
