Ni amahugurwa yateguwe na Ineza Foundation ku bufatanye n’Akarere ka Rulindo aterwa inkunga Book Aid International hamagijwe kongerera ubumenyi abarezi b’abana.

Yitabiriwe n’abakora mu Ngo Mbonezamikurire zitandukanye, zirimo izikorera mu bigo by’amashuri, izikorera mu ngo z’abaturage, n’izegereye abaturage zizwi nka Community based ECD.

Umukozi ushinzwe gukurikirana gahunda mbonezamikurire y’abana bato, mu Karere ka Rulindo, Ndayambaje Jean Damascene yavuze ko aya mahugurwa azafasha kuziba ibyuho bikigaragara mu mikorere y’ingo mbonezamikurire ndetse akazarangira bahuguwe ku mikoreshereze y’imfashanyigisho zisanzwe n’izo bazahabwa na Ineza Foundation.

Ati: “Aya mahugurwa icyo tuyitezeho ni ukuziba ibyuho byagaragajwe muri izo ngo mbonezamikurire no kongerera ubumenyi bariya barezi bazikoramo kuburyo bagomba gutanga serivisi mbonezamikurire y’abana bato, bifashishije iriya mfashanyigisho ‘Umwana wanjye ishema ryanjye’ n’izindi tuzahabwa na Ineza Foundation.”

Ndayambaje yavuze ko icyo basaba abazikoramo ari ugutanga serivisi zose ziteganywa muri ECD ntanimwe yirengagijwe.

Ati: “Icyo tubasaba ni ugutanga serivisi mbonezamikurire zikomatanyije nta n’imwe bakuyemo, ninayo mpamvu wabonye twahuje ibyiciro by’ingo mbonezamkiruire zitandukanye. Ni ukugira ngo duhuze iyo mikorere, akenshi ziriya zikorera mu bigo by’amashuri zifata nk’aho iyo serivisi itabareba turashaka kugira ngo izo serivisi zose zubahirizwe mu byiciro butandukanye.”

Mu bitabiriye harimo Ingo mbonezamikurire y’abana bato zazimye aho mu Murenge wa Shyorongi honyine zigera kuri 25 muri rusange zikagera muri 86 mu Karere kose. Ni ukuvuga izafunze imiryango burundu cyangwa zikora rimwe na rimwe.

Ingingo nyamukuru ziyishingiyeho ziganirwaho, ni ijyanye no gukangura ubwonko bw’umwana no kuzamura ubushake bwo gusoma no gukunda inkuru mu bana batangiye kumenya gusoma.

Mu Karere ka Rulindo habarurwa ingo mbonezamikurire y’abana bato zigera kuri 836.

Politiki y’igihugu mbonezamikurire y’abana bato yemejwe mu 2011 ivugururwa mu 2016. Igamije guha abana bari munsi y’imyaka 6 amahirwe angana kuri serivisi z’imbonezamikurire y’abana bato.

Ifite intego yo gutoza no gufasha ababyeyi guha abana uburere buboneye, gutegurira abana kuzatangira neza amashuri abanza, kurwanya impfu z’abana, kurwanya imirire mibi n’igwingira, kurengera uburenganzira bw’umwana no guhuza, gukurikirana no gusuzuma ibikorwa byose byerekeye imikurire y’abana.

    Yanditswe na Nkurunziza Bonaventure