Ni umunsi waranzwe n’ibyishimo ndetse abagore bagaragaza ibikorwa by’indashyikirwa bamaze kugeraho banahiga gukomeza kugira uruhare mu iterambere ry’Igihugu no gusigasira ihame ry’uburinganire n’ubwuzuzanye.

Mu ijambo ry’ikaze, Umuyobozi w’Akarere ka Rulindo Mm Mukanyirigira Judith yashimye uruhare abagore bakomeje kugaragaza mu iterambere cyane cyane bibumbira mu makoperative ndetse n’uruhare rwabo mu kubaka umuryango utekanye ati: “Nk’uko insanganyamatsiko y’uyu munsi ibivuga, umugore ni uw’agaciro, agaciro mufite gakomeje kugaragazwa n’iterambere umugore wo mu Karere kacu ka Rulindo agezeho uhereye no kubikorwa na Koperative z’abagore zaje kumurika ibikorwa byazo hano, turabashimira kandi ko amakimbirane yo mu miryango agenda agabanuka ahanini bigizwemo uruhare n’abagore kuko ari ba Mutimawurugo”.

Umuhuzabikorwa w'inama y'igihugu y'Abagore mu karere ka Rulindo Madamu Ngaruyimanzi Diane yavuze ko uyu munsi ari umwanya mwiza wo guha icyubahiro no gushimira abagore bose bashyira imbaraga mubyo bakora harimo kuba ababyeyi, abarezi, abayobozi bagakora bakiteza imbere batezimbere ,umuryango n'igihugu muri rusange.

Senateri Niyomugabo Cyprien wari kumwe n’abagize ihuriro ry’Abanyarwandakazi bari mu Nteko Ishinga Amategeko (FFRP),aribo ,Hon Depite MUKARUSAGARA Alianne na Hon Depite Izere Ingrid parfaite bifatanyije n’abaturage b'akarere ka Rulindo mu murenge wa Kinihira kwizihiza uyu munsi nawe yagarutse ku bimaze kugerwaho mu guteza imbere ihame ry’uburinganire n’ubwuzuzanye byatumye abagore bitinyuka bagafatanya n’abagabo mu kubaka Igihugu mu nzego zose, abibutsa kurwanya amakimbirane kuko asenya umuryango, ati: “Amakimbirane atera ubukene, akagira ingaruka ku mikurire n’imyitwarire y’abana akenshi bikaba biterwa n’ubusinzi, gucana inyuma kw’abagize umuryango n’ibindi.”

Muri uyu muhango ,umuryango wa Twagirayezu Gerard na Mukakimenyi Angelique batanze ubuhamya bw’uko umuryango wabo wahoraga mu makimbirane bikaba byarabatezaga ubukene ariko nyuma yo kugana inkiko no kuganirizwa n’Ubuyobozi kuri ubu babanye neza kandi iterambere ryarazamutse ndetse bashobora kubaka umuryango utuje kandi utekanye.

Mu kwizihiza uyumunsi mpuzamahanga w'umugore mu karere ka Rulindo mu murenge wa Kinihira hanasezeranye imiryango 14 y'abanaga idasezeranye muburyo bwemewe n'amategeko 

Mu rwego rwogukomeza guteza imbere abagore, muri ibi birori hanatanzwe Inka,Intama,ndetse n'ibiryamirwa birimo Matora,amashuka ,na kuvurori.

Senateri Niyomugabo Cyprien, na Hon Depite MUKARUSAGARA Alianne, Hon Depite Izere Ingrid parfaite bagize ihuriro ry’Abanyarwandakazi bari mu Nteko Ishinga Amategeko (FFRP) bifatanyije n'abaturage ba Kinihira

Abagore n'abakobwa bari munzego z'umutekano bari babukereye bitabiriye ibi birori

                            AMAFOTO????

Yanditswe na nkurunziza Bonaventure