RULINDO: HATANGIJWE GAHUNDA YO KWITA KU BANA N’ URUBYIRUKO MU BIRUHUKO
Kuri uyu wa gatatu mu mirenge yose igize akarere ka Rulido hatangijwe gahunda yo kwita kubana n’ urubyiruko igamije kubarinda kujya mu ngeso mbi zibangiriza ubuzima.ni gahunda ifite insanganyamatsiko igira iti: ubuzima bwiza Agaciro kanjye.
Ku rwego rw’Akarere iki gikorwa cyatangirijwe mu kigo cy’urubyiruko kiri mu murenge wa shyorongi gitangizwa ku mugaragaro n’umuyobozi w’Akarere madamu MUKANYIRIGIRA Judith ari kumwe n’intumwa yaturutse mu nteko ishinga amategeko Hon ICYITEGETSE Venuste hamwe n’abagize inzego z’umutekano.
Atangiza iyi gahunda umuyobozi w’Akarere ka Rulindo madamu MUKANYIRIGIRA Judith yasabye ababyeyi gushyigikira iyi gahunda bohereza abana babo kugirango bahabwe amasomo yateguwe.
Yagize ati:”mbere na mbere turasaba ababyeyi guyishyigikira iyi gahunda ndetse no kohereza abana kuza gukurikirana amasomo yateguwe, babyeyi, nimwe mufite uruhare runini kugira ngo iyi gahunda izagende neza,ubufatanye bwanyu ni ingenzi kandi burakenewe”.
Umuyobozi w’Akarere kandi yasobanuye inyungu abana n’urubyiruko bazakura muri iyi gahunda binyuze mu bikorwa biteganyijwe, birimo amasomo ajyanye n’uburere mboneragihugu kwiga indangagaciro z’umuco nyarwanda no kugira isuku.
Muri iyi gahunda y’urubyiruko mu biruhuko abana bazagirana ibiganiro hagati yabo ndetse habeho kuvumbura no gukuza impano bifitemo binyuze mu mikino, siporo n’ubuhanzi, kumenya guhanga umurimo n’ibindi.
Hon ICYITEGETSE Venuste umudepite mu nteko ishingamategeko wari waje kwifatanya n’abana n’urubyiruko bo mu karere ka Rulindo mu gutangiza iyi gahunda yasabye urubyiruko kuzitabira iyi gahunda rukurikira amasomo bazahabwa n’abatoza ndetse abakangurira kwirinda ibiyobyabwenge n’izindi ngeso mbi ahubwo bagaharanira gusigasira ibyagezweho.
Iyi gahunda mu karere ka Rulindo yitabiriwe n’abana bagera ku 22253 mu bana 27119 bari bateganyijwe buri murenge ukaba ufite site zirenze 3 ariko ukagira site y’icyitegererezo
AMAFOTO
Yanditswe na Nkurunziza Bonaventure
