Rwamagana–Karenge: Kwizihiza Umunsi Mpuzamahanga w’Amazi byibanze ku kunoza uburyo bwo kubona amazi meza n’isuku
Rwamagana–Karenge: Kwizihiza Umunsi Mpuzamahanga w’Amazi byibanze ku kunoza uburyo bwo kubona amazi meza n’isuku
Ku wa 22 Werurwe 2026, Akarere ka Rwamagana kifatanyije n’isi yose kwizihiza Umunsi Mpuzamahanga w’Amazi. Ibirori byabereye mu Murenge wa Karenge, aho uruganda rutunganya amazi rurimo kwagurwa.
Abaturage bo muri aka gace bavuga ko nubwo hari intambwe igaragara imaze guterwa mu kubona amazi, hakiri imbogamizi zijyanye no kuboneka kwayo. Musabyeyezu Jean Pierre, utuye i Karenge, asobanura ko amazi aboneka ariko rimwe na rimwe akabura iminsi igera kuri ibiri:
« Nubwo amazi ajya abura, ntibirenze iminsi ibiri kuko turi hafi y’uruganda. Mbere y’uko rwubakwa twari dufite amazi make cyane, ariko ubu ibintu byarateye imbere kandi duteganya no kuyakoresha mu kuhira imyaka. »
Ku ruhande rwe, Dukundimana Josée agaragaza ko ingano y’amazi itarahagije ugereranyije n’ubwiyongere bw’abaturage:
« Amazi arahari, ariko ntiarahagije kubera ko abaturage biyongera. Hari igihe abura iminsi itatu cyangwa ine, bigatuma isuku idakorwa neza. »
Yongeraho ko iki kibazo giterwa no gusangira amazi n’utundi turere, asaba ko imiyoboro iyageza ku baturage yakwagurwa.
Mu ijambo rye, Umuyobozi Mukuru muri Minisiteri y’Ibikorwaremezo, Madamu Gemma Maniraruta, yibukije ko insanganyamatsiko y’uyu mwaka igaragaza isano iri hagati y’amazi n’uburinganire bw’ibitsina. Yashimangiye ko kubona amazi meza, isuku n’isukura ari uburenganzira bw’ibanze kandi ari inkingi y’iterambere rirambye.
Yagaragaje kandi ko Umujyi wa Kigali ukeneye metero kibe 210,000 z’amazi ku munsi, mu gihe haboneka 90,000 gusa, bingana hafi na kimwe cya gatatu cy’ibikenewe. Ibi bituma amazi acibwa rimwe na rimwe kandi agatangwa mu buryo bugabanyije.
Madamu Maniraruta yavuze ko uruganda rw’amazi rwa Karenge ruzagira uruhare rukomeye mu gukemura iki kibazo, kuko ruzaha amazi Akarere ka Rwamagana, Intara y’Iburasirazuba ndetse n’Umujyi wa Kigali. Yanavuze ku mbaraga za WASAC na Leta mu kugabanya igihombo cy’amazi mu miyoboro no kunoza imicungire yayo.
Imirimo yo kwagura uru ruganda imaze kugera kuri 30%, kandi izatuma ubushobozi bwo gutunganya amazi bwiyongera buva kuri metero kibe 12,000 bugera kuri 48,000 ku munsi. Ruzagaburira amazi ibice bitandukanye bya Kigali, birimo Kimironko, Remera, Masaka n’igice cya Kicukiro, ndetse n’Akarere ka Rwamagana.
Ubu Akarere ka Rwamagana kabona hafi metero kibe 8,000 z’amazi ku munsi, mu gihe hakenewe 16,000, bigatuma amazi atangwa mu buryo bwo gusimburana buri munsi. Imirimo nirangira, iki kibazo kizaba gikemutse burundu, kandi abaturage bazabona amazi ahagije mu myaka 20 iri imbere.
Uretse ibikorwaremezo, hanagaragajwe akamaro k’uruhare rw’urubyiruko mu kurinda umutungo w’amazi. Madamu Maniraruta yashimye ibitekerezo bishya byatanzwe n’urubyiruko, abashishikariza gukomeza.
Yasoje asaba abaturage gukoresha amazi neza, kubungabunga isuku, no kwirinda indwara zituruka ku isuku nke, harimo no gukaraba intoki buri gihe.
Kwizihiza uyu munsi byatanze ubutumwa bukomeye bugira buti: « Amazi ni ubuzima », bityo buri wese asabwa kuyabungabunga no kuyakoresha neza.
