Ikigo cyo mu Buyapani gikora ubucuruzi bw’imodoka, Toyota Motor Corporation, cyaciye agahigo ko gucuruza imodoka miliyoni 11,2 mu 2023, bituma kigumana ikamba cyari gisanganywe ryo kugurisha imodoka nyinshi mu mwaka umwe, ikamba kimaranye imyaka ine yikurikiranya.
Zimwe mu modoka zagurushijwe harimo iz'uruganda rwa Lexus, rwa Toyota Motor Corporation, rumenyereweho gukora izihenze kandi zijyanye n'igihe
Muri izi modoka zagurishijwe harimo iz’uruganda Hino Motors, iki kigo gifitemo imigabane hakabamo n’iza Daihatsu, uruganda rushamikiye kuri Toyota Motor Corporation.
Iki kigo cyatangaje ko ubucuruzi bw’imodoka zacyo bwazamutseho 7.2% ugereranyije n’umwaka wari wabanje, ndetse ko inyinshi zagurishijwe hanze y’u Buyapani, zingana na miliyoni 8,9.
Uruganda rwaje ku mwanya wa kabiri ni urwa Volkswagen Group, rwatangaje ko ubucuruzi bwarwo bwazamutseho 12% mu 2023, aho rwacuruje imodoka zingana na miliyoni 9,2, akaba ari nazo nyinshi rwacuruje mu mwaka umwe, nyuma ya Covid-19.
Inyinshi mu modoka zose zagurishijwe n’ikigo Toyota Motor Corporation, zingana na miliyoni 10,3, z’uruganda rwa Toyota n’urundi rw’iki kigo rumenyerewe mu gukora imodoka zihenze kandi zigezweho rwa, Lexus.
Kimwe cya gatatu cyazo ni izikoresha amashanyarazi na lisansi icyarimwe mu gihe izikoresha amashanyarazi zonyine zingana na 1% mu zagurishijwe.
![Byatangiye ari umwana! Glorie wabaye ikimenya bose mu gufotora bya kinyamwuga bimubeshejeho [AMAFOTO]](https://www.bigezweho.rw/uploads/images/202401/image_430x256_65aba95e7706b.jpg)
