Aba banyarwanda bakirwa banyujijwe mu Karere ka Rubavu, aho ubuyobozi bubafasha gusubira mu buzima busanzwe ndetse bagahabwa ubufasha bw’ibanze mbere yo gusubizwa mu miryango yabo cyangwa aho bakomoka.

Mu butumwa bwatanzwe n’Umuyobozi w’Akarere ka Rubavu, Mulindwa Prosper, yakiriye bamwe muri aba baturage abibutsa ko bageze mu gihugu cyabo kibatekanye kandi gifite amahirwe menshi yo kubafasha kongera kubaka ubuzima bwabo.

Yagize ati: “Mugeze iwanyu mu Rwanda, igihugu gifite umutekano n’ubuyobozi bwita ku baturage. Ibyo mwanyuzemo birarangiye, ubu igihe ni icyo kongera gutekereza ejo hazaza no gukabya inzozi zanyu.”

Benshi mu batahutse bavuga ko imyaka bamaze mu mashyamba ya Congo yaranzwe n’ubuzima bugoye, inzara, umutekano muke ndetse no gukoreshwa ibikorwa by’urugomo n’imitwe yitwaje intwaro irimo FDLR.

Bavuga ko amahirwe yabonetse nyuma y’impinduka z’umutekano zabaye mu Mujyi wa Goma n’ahandi hafi yawo yabafashije kubona uburyo bwo guhunga iyo mitwe no gushaka gutaha mu gihugu cyabo.

Umwe mu batahutse yavuze ko yari amaze imyaka isaga 15 muri Congo ariko ko yahoze arota kuzongera kubona u Rwanda.

Ati: “Twabayeho mu buzima bubi cyane. Twari tumaze igihe twumva ko tutazigera dutaha. Kuba tugeze hano ni ibyishimo bikomeye ku miryango yacu.”

Guverinoma y’u Rwanda ikomeje gufatanya n’imiryango mpuzamahanga mu kwakira no gufasha aba banyarwanda batahutse, harimo kubaha ibyangombwa, ubuvuzi, ubufasha bwo mu mutwe ndetse no kubafasha kongera kwinjira mu buzima busanzwe.

Abasesenguzi bavuga ko gutahuka kw’aba banyarwanda ari ikimenyetso cy’uko benshi mu bari bakiri mu mashyamba ya Congo batangiye kubona ko ubuzima bw’imitwe yitwaje intwaro budafite ejo hazaza, ahubwo ko amahitamo meza ari ugutaha bagafatanya n’abandi kubaka igihugu cyabo.

Ibi kandi bishimangira uruhare rw’u Rwanda mu gukomeza kwakira abaturage barwo no kubafasha kongera kugira icyizere cy’ejo hazaza nyuma y’igihe kinini bari bamaze mu bibazo n’ubuhunzi.