Mu rwego rwo gushaka ibisubizo birambye ku kibazo cy’izamuka rikabije ry’ibiciro bya peteroli ku isoko mpuzamahanga, Guverinoma y’u Rwanda yatangaje ko iri gutegura gahunda yo guhindura imodoka zisanzwe zikoresha lisansi cyangwa mazutu, zikajya zikoresha amashanyarazi cyangwa gaz.

Iyi gahunda iri gutekerezwa mu gihe ibiciro by’ibikomoka kuri peteroli bikomeje kuzamuka ku Isi hose, ibintu byagize ingaruka zikomeye no ku Rwanda. Mu minsi ishize, igiciro cya lisansi cyazamutse ku buryo litiro imwe yageze hafi ku 3.000 Frw, ibintu byakomeje kuremerera abatwara ibinyabiziga ndetse n’abakoresha ubwikorezi bwa buri munsi.

Ubwiyongere bw’ibiciro bya peteroli bwatewe cyane n’intambara zikomeje kuvugwa mu Burasirazuba bwo Hagati, zirimo amakimbirane ya Israel, Amerika na Iran, byagize ingaruka ku nzira ya Hormuz inyuzwamo igice kinini cya peteroli ikoreshwa ku Isi.

Minisiteri y’Ibikorwaremezo ivuga ko u Rwanda rudashaka gukomeza kugendera gusa ku modoka zikoresha lisansi, ahubwo rushaka gutangira kwinjira mu buryo bushya bwo gukoresha ibinyabiziga birengera ibidukikije kandi bidakoresha amafaranga menshi.

Umujyanama Mukuru muri Minisiteri y’Ibikorwaremezo ushinzwe gutwara abantu n’ibintu, Byiringiro Alfred, yavuze ko hari ibiganiro biri kuba hagati ya Leta n’ibigo mpuzamahanga bifite ikoranabuhanga ryo guhindura imodoka zisanzwe zikajya zikoresha amashanyarazi cyangwa gaz.

Yagaragaje ko u Rwanda rwamaze kugira uburambe muri uru rwego binyuze muri gahunda yo guhindura moto zisanzwe zikoresha lisansi zikaba iz’amashanyarazi. Kugeza ubu, moto zirenga 80 zamaze guhindurwamo izikoresha amashanyarazi mu rwego rw’igerageza.

Hari ibigo byo mu bihugu nka Pologne na Turikiya byamaze kugirana ibiganiro n’u Rwanda, byemeza ko bishoboka guhindura imodoka zisanzwe zikoresha lisansi zigakoresha gaz cyangwa amashanyarazi.

Leta y’u Rwanda kandi irateganya gukoresha gaz izajya icukurwa mu Kiyaga cya Kivu mu guteza imbere ubu buryo bwo gutwara abantu n’ibintu. Biteganyijwe ko guhera mu 2028 u Rwanda ruzaba rutangiye kubona gaz nyinshi yo gutekesha ndetse no gukoresha mu binyabiziga.

Abasesenguzi bavuga ko gukoresha imodoka zikoresha amashanyarazi cyangwa gaz bishobora kugabanya amafaranga igihugu gitakaza gitumiza peteroli hanze, ndetse bikanafasha mu kugabanya imyuka ihumanya ikirere.

Kugeza ubu, ibinyabiziga biri mu bintu bitanga imyuka myinshi yangiza ikirere mu Rwanda, aho bibarirwa kohereza mu kirere hafi 12% by’imyuka yose ihumanya igihugu.

Guverinoma yamaze no gufata icyemezo gisaba ibigo bya Leta ko nibura 30% by’imodoka bigura zigomba kuba zikoresha amashanyarazi, mu rwego rwo gutanga urugero no guteza imbere ikoreshwa ry’ingufu zisukuye.

Hari icyizere ko iyi gahunda ishobora gufasha Abanyarwanda kubona uburyo bwo gutwara abantu n’ibintu buhendutse, cyane cyane mu gihe ibiciro bya peteroli bikomeje kuzamuka ku rwego mpuzamahanga.