Ikipe y’Igihugu ya Uganda yatsinze Niger ibitego 2–0 mu mukino wabereye kuri sitade Nelson Mandela National Stadium ku mugoroba wo ku wa mbere, yegukana intsinzi ya kabiri yikurikiranya muri CHAN bwa mbere mu mateka yayo, ikomeza kongera amahirwe yo kugera muri 1/4 cy’irangiza.

Allan Okello yafunguye amazamu hagati mu gice cya mbere nyuma y’aho yari amaze kubura Penalite, mbere y’uko Joel Sserunjogi atsinda igitego cya kabiri mu minota ya mbere y’igice cya kabiri.

Iyi ntsinzi yakurikiye umukino wabanje gukinwa mbere aho Afurika y’Epfo yatsinze Guinea 2–1, ishyira Ubuganda ku mwanya wa mbere n’amanota 6 mu mikino 3, bukurikirwa na Algeria ifite amanota 4 mu mikino 2, Afurika y’Epfo ifite 4 mu mikino 2 na Guinea ifite amanota 3 mu mikino 3, mu gihe Niger iri ku mwanya wa nyuma nta nota na rimwe ifite.

Ku munota wa 20, Reagan Mpande yategewe mu rubuga rw’amahina. VAR yemeza ko habayeho ikosa, Adamou Djibo ahabwa ikarita y’umuhondo. Okello yateye penaliti ku munota wa 23 ariko umuzamu Mahamadou Tanja ayikuramo.

Nyuma y’iminota ibiri gusa, Allan Okello yinjiye mu rubuga rw’amahina atsinda igitego cya mbere n’umutwe ku munota wa 25.

Ku munota wa 56, Ubuganda bwatsinze igitego cya kabiri ku mukino mwiza wihuta. Okello yanyuze mu kibuga hagati, aha umupira Sserunjogi, atsinda igitego nyuma yo gukoresha imbaraga nyinshi.

Kuri uyu wa kabiri tariki 12 Kanama 2025, CHAN iraza gukomeza hakinwa imikino 2 irimo urahuza Senegal na DRC saa Kumi n'imwe ndetse na Sudan na Nigeria ku isaha ya saa Mbili z'ijoro.

   Yanditswe na Nkurunziza Bonaventure