Mu Murenge wa Kazo mu Karere ka Ngoma District, haravugwa inkuru y’urupfu rw’umugabo w’imyaka 45 witabye Imana nyuma y’amakimbirane akomeye yagiranye n’umukobwa w’imyaka 25 usanzwe ukora uburaya, bapfuye amafaranga bari bumvikanye ku gikorwa cy’ubusambanyi.

Ibi byabaye mu ijoro ryo ku wa Mbere tariki ya 27 Mata 2026, mu Mudugudu wa Kagusa, Akagari ka Kagarama, mu Murenge wa Kazo.

Amakuru aturuka muri ako gace avuga ko uwo mugabo yajyanye n’uwo mukobwa aho akorera uburaya, nyuma yo kumvikana ku mafaranga angana na 1.500 Frw. Nyuma yo kurangiza igikorwa, ngo hagaragaye ubwumvikane buke ubwo umugabo yahitagamo kumuha 500 Frw aho kumuha amafaranga bari bumvikanye.

Ibi byateje intonganya zikomeye hagati yabo bombi, bituma batangira kurwana. Abaturage bavuga ko urwo rugomo rwarushijeho gukaza umurego kugeza ubwo uwo mugabo yaguye hasi, bikaza kurangira atitabye Imana.

Uwo mukobwa ukekwaho uruhare muri urwo rupfu, ngo yahise afatwa n’inzego z’umutekano nyuma y’uko bivugwa ko na we ubwe yiyemereye ko habayeho imirwano yabateye guterana amagambo no kurwana.

Yavuze ko amakimbirane yaturutse ku mafaranga bari bumvikanyeho, aho ngo yumvaga atishimiye amafaranga yahawe, bikavamo guterana amagambo no kurwana bikomeye.

Umunyamabanga Nshingwabikorwa w’Umurenge wa Kazo, Kanzayire Consolée, yemeje aya makuru, avuga ko inzego z’umutekano zahise zitabara zikanafata uwo mukobwa ukekwaho icyaha.

Yagize ati: “Uwo mugabo yagiye gusambana ahantu hamenyerewe ko hakorerwa uburaya. Nyuma yo kurangiza, habayeho kutumvikana ku mafaranga. Bari bumvikanye 1.500 Frw ariko yatanze 500 Frw, bituma bashyamirana bikomeye, bikaza kuvamo imirwano yamuhitanye.”

Yakomeje avuga ko umurambo wa nyakwigendera wajyanywe ku bitaro na RIB kugira ngo ukorerwe isuzuma (autopsie) mbere y’uko ushyingurwa mu cyubahiro.

Bamwe mu baturage bo muri ako gace bavuga ko batatunguwe cyane n’aya makuru, kuko ngo mu gace ka Kagusa hakunze kugaragara ibikorwa by’uburaya ndetse n’abantu banywa ibisindisha bikabije, bigatera amakimbirane kenshi.

Hari abavuga ko hakenewe ubukangurambaga bukomeye bwo kurwanya uburaya n’inzoga z’inkorano, kuko zishobora gutera impfu nk’izi cyangwa izindi ngaruka mbi ku muryango.

Inzego z’ubuyobozi zisaba abaturage kwirinda amakimbirane ashingiye ku mafaranga, kwirinda ubusinzi bukabije, ndetse no guhita batanga amakuru ku gihe igihe hari ibibazo by’umutekano muke cyangwa imyitwarire idahwitse.

Kugeza ubu, iperereza rirakomeje kugira ngo hamenyekane neza uko urupfu rw’uwo mugabo rwabaye, ndetse n’uruhare nyakuri rw’abarwanyi bombi muri aya makimbirane.