Zambia: Abashinwa 22 bakoze ibyaha byu bwambuzi mu bihugu bitandukanye bakatiwe
Urukiko Rukuru rwo muri Zambia kuri uyu wa 7 Kamena 2024 rwakatiye igifungo kiri hagati y’imyaka irindwi na 11 Abashinwa bari bakurikiranweho kwiba abantu bo mu iki gihugu, Singapore, Peru na Leta Zunze Ubumwe z’Abarabu, bifashishije ikoranabuhanga.
Muri Mata 2024, inzego z’ubutabera n’iz’umutekano zataye muri yombi abantu 77 bakorera ikigo Golden Top Support Services cy’Abashinwa nyuma y’iperereza ryakurikiye ugutaka kw’abaturage benshi bavugaga ko bari kwibwa amafaranga kuri telefone no kuri banki n’abantu batazi.
Icyo gihe muri iki kigo giherereye mu nkengero z’Umurwa Mukuru, Lusaka, hafatiwe amakarita ya telefone 13.000 arimo ayabaruriwe muri Zambia no mu bindi bihugu, imbunda ebyiri ndetse n’amasasu 78.
Umuyobozi w’Ishami rya Polisi ya Zambia rishinzwe kurwanya ibiyobyabwenge, Nason Banda, yasobanuye ko abahawe akazi n’iki kigo bari hagati y’imyaka 20 na 25 y’amavuko basobanuye ko bari barahawe inshingano kujya bavugana n’abantu bakoresha imbuga nkoranyambaga kugira ngo babariganye amafaranga.
Abo muri Zambia, ari na bo bari biganje mu batawe muri yombi bararekuwe nyuma yo gutanga ingwate, Abashinwa 22 n’undi ukomoka muri Cameroun bashinjwaga kuyobora ibi bikorwa bo bakomeje gufungwa.
Nyuma y’aho uru rukiko rubakatiye iki gifungo, rwanategetse ko batanga ihazabu y’amadolari ari hagati ya 1500 (miliyoni 1,9 Frw) na 3000 (miliyoni 3,8 Frw).
