Urukiko rwa Gisirikare rwa Kisangani mu Ntara ya Tshopo rwatangiye kuburanisha abasirikare 84 b’igisirikare cya Repubulika Iharanira Demokarasi ya Congo (FARDC). Aba basirikare baregwa kwigomeka ku buyobozi, kwanga kurwana n’indi myitwarire mibi mu kazi, ibyaha bishobora kubageza ku gihano cy’urupfu.

Ubushinjacyaha bwa Gisirikare bugaragaza ko iki kibazo cyatangiye muri Gashyantare 2026, ubwo aba basirikare bari baroherejwe mu Mujyi wa Pinga muri Teritwari ya Walikale. Ibyaha bakurikiranyweho birimo:

• Kwanga kujya ku rugamba: Bivugwa ako abasirikare banze kujya guhangana n’inshingano bahawe zo kurwanya umutwe wa AFC/M23.
• Kwigomeka: Basobanuye ko batiteguye kurwana batarahabwa agahimbazamusyi kabo, bituma batangira kurasa mu Mujyi wa Pinga mu buryo bwo kwigaragambya.
• Kwangiza intwaro: Ubushinjacyaha bwavuze ko aba basirikare bangije intwaro zifashishwa ku rugamba binyuranyije n’amategeko.

Nk'uko tubikesha "IGIHE" Umuyobozi wa zone ya gatatu y’igisirikare cya RDC ikorera muri Walikale, ari na we watanze ikirego, yasabye urukiko ko aba basirikare bahanwa "by’intangarugero". Intego ni ukubera abandi urugero kugira ngo hagabanywe umuco wo kwigomeka mu gihe igisirikare kiri mu rugamba rukomeye.

Ku rundi ruhande, abanyamategeko bunganira aba basirikare batangaje ko ibi birego nta shingiro bifite. Basobanuye ko uru rubanza, rwatangiye ku wa 29 Mata 2026, rushobora guteza amacakubiri n’icikamo ry’ibice mu gisirikare cya RDC mu gihe rwaba rudaciwe mu mucyo.

Mu gihe urukiko rwazaba rwahamije aba basirikare ibyaha baregwa, itegeko riteganya ko bazakatirwa igihano cy’urupfu. Iki gihano si gishya muri uyu mwuka w’intambara muri RDC, kuko cyagiye gihabwa n’abandi basirikare bagiye bahamwa n’ibyaha nk’ibi mu bihe byashize.