Babigarutseho kuri uyu wa 16 Mutarama 2026 mu nama yabereye mu Karere ka Gicumbi, bibutswa kurushaho kwigisha bagenzi babo bakigaragara mu ngeso zo gukoresha ibiyobyabwenge, ubusinzi ndetse n’abashobora kwishora mu buraya.

Intara y’Amajyaruguru igizwe n’urubyiruko rugera ku bihumbi 273.140 harimo abagera ku bihumbi 97.843 biyemeje kwitanga bagakora imirimo y’abakorerabushake.

Mu byagarutsweho kandi bashimye ibikorwa byaranze urubyiruko rw’abakorerabushake mu ntara y’Amajyaruguru, harimo kubakira abatishoboye amazu 144, bubatse ubwiherero 838, ndetse no kurwanya imirire mibi byatumye bakora uturima tw’igikoni tugera ku bihumbi 18.943 mu rwego rwo gushyira umuturage ku isonga.

Mu byaganiriweho Kandi bibanze ku byifuzo n’ibitekerezo urubyiruko rw’amajyaruguru rufite hagamijwe kurushaho kubaka u Rwanda bifuza.

Umuyobozi w’ intara y’Amajyaruguru Mugabowagahunde Maurice yashimye ubwitange bw’ibikorwa byaranze urubyiruko muri 2024-2025, harimo kwitanga bagakora amanywa n’ijoro bagamije kubaka igihugu gitekanye kandi gifite amahoro.

Yagize Ati:” Turishimira urubyiruko rukomeje kugaragara mu bikorwa byo gukunda igihugu, kubaka ubumwe no kwitanga, ariko kandi mukarushaho gukora nta gutezuka ndetse mubyo mukora mukarushaho kwita ku mibereho y’abaturage mukabigisha kugira isuku, no kubaka uturima tw’igikoni hagamijwe kurwanya imirire mibi n’igwingira”.

Tuyisenge Didier uhagarariye urubyiruko rw’abakorerabushake mu Murenge wa Byumba, avuga ko nubwo abakorerabushake batangiye muri 2013 yasanze bisaba gukunda igihugu, ndetse ko yamaze kwegera bagenzi be bikamufasha kurushaho gutekereza byagutse dore ko bahuje ibitekerezo bagakusanya n’udufaranga twabo, kuri ubu bageze hafi Miliyoni bagamije gukora umushinga w’ubuhinzi bw’ibihumyo.

Muri iyi nama bunguranye ibitekerezo bigamije gufasha urubyiruko kumenya inzira banyuramo hagamijwe kwihangira imirimo ngo babashe kurwanya ubushomeri.

Minisitiri w’urubyiruko n’iterambere ry’ubuhanzi Dr Utumatwishima Abdallah yatanze ikiganiro gifite insanganyamatsiko igira iti:” u Rwanda rwanjye agaciro kanjye”.

Yagize Ati:” Turusheho gukorera igihugu ariko natwe tubikore tugaragara neza, twigishe abantu isuku n’ibindi Kandi natwe tubikore dusa neza kugira ngo ibyo dukora tube intangarugero mu baturage”.

Yongeyeho ko umuntu utanga serivisi nziza agomba kubikora nk’ikirango cy’igihugu cy’u Rwanda bikaba umuco n’izina ryiza ku gihugu cyacu, hakabaho kumenya uko bakwakira abashyitsi babagana, bigakorwa haba mu mahoteri n’ahandi hose hagomba kwerekana neza isura y’igihugu.

Ati:” Nta rundi rubyiruko dufite nk’abantu babakorerabushake bashobora kudufasha kwerekana igihugu neza, mwigishe abakigaragaho ibintu byakosorwa kandi bikaba byaba byiza mu buryo budasabye ingengoyimari nko guhindura imyumvire yo kugira isuku, kurwanya abajugunya amacupa aho babonye, kandi mukabikorana indangagaciro y’abana b’abanya Rwanda”.

Ubuyobozi bwa Police mu ntara y’Amajyaruguru bukorana cyane n’uru rubyiruko nabwo bushimangira ubwitange bw’urubyiruko mu kubungabunga umutekano w’igihugu, kuko nta rubyiruko kubona umutekano byarushaho kuba ikibazo gikomeye ahantu hose.

Bagarutse ku bikorwa byo kurwanya ibiyobyabwenge, kwerekana aho bacukura amabuye mu buryo butemewe, ndetse ko bagira uruhare mu gukumira abinjira n’abasohoka ku mupaka banyuze mu nzira zitazwi, gusa basabwa kurushaho gukorera igihugu cyane cyane bagatunga agatoki ahabera ibyaha kuko usanga ariho urubyiruko ruturiye.

Minisitiri w’urubyiruko n’iterambere ry’ubuhanzi Dr Utumatwishima Abdallah ari kumwe na Guverineri Mugabowagahunde Maurice baganirije urubyiruko

Urubyiruko rw’abakorerabushake rwaturutse mu ntara y’Amajyaruguru

Inama yabereye mu nzu mberabyombi y’Akarere ka Gicumbi

Yanditswe na nkurunziza Bonaventure