Abigaragambya bashyigikiye Palestine muri Mexique, batwitse igice kimwe cya Ambasade ya Israel iri mu Murwa Mukuru w’iki gihugu, nyuma yo guhangana n’abapolisi bari boherejwe ngo babahagarike.
Mu ntangiriro z’iki cyumweru ababarirwa muri 200 nibo bari bahuriye mu gace ka Lomas de Chapultepec muri Mexico City, bahamagarira amahanga "kugira icyo bakora mu buryo bwihuse ku biri kubera muri Rafah”.
Byabaye nyuma y’uko ku Cyumweru tariki ya 26 Gicurasi 2024, ibitero by’indege z’igisirikare cya Israel byishe abanye-Palestine 45 mu gace ka Rafah muri Gaza.
Aba bigaragambyaga bari bambaye ibibahisha amasura yabo, batangira gutera amabuye n’ibiturika ku bapolisi bari babitambitse batangira kurwana nabo bashaka kwinjira muri Ambasade.
Amashusho yakwirakwijwe ku mbuga nkoranyambaga, yagaragayemo abapolisi bari kurwana no kuzimya umuriro wari wafashe igice kimwe cya Ambasade, mu gihe ku rundi ruhande abigaragambyaga bo bashakaga kuyitwika yose.
Mexique nayo yunze mu rya Afurika y’Epfo isaba Urukiko Mpuzamahanga rw’Ubutabera [ICJ], ko hakwiye gufatwa imyanzuro yihutirwa kuri Leta ya Israel mu rwego rwo gukumira ubwicanyi bukomeje gukorerwa Abanye-Palestine muri Gaza.
Ku wa Gatanu w’icyumweru gishize, ICJ, yategetse Guverinoma ya Israel, “Guhita ihagarika ibitero n’ibindi bikorwa byose muri Rafah, bishobora gushyira ubuzima bw’Abanye-Palestine bari muri Gaza mu kaga bikabasenya mu buryo bumwe cyangwa ubundi.”
Israel yo ariko yateye utwatsi ibyo gukora Jenoside muri Gaza ndetse inavuga ko ibyo ikora byose bitarenga ku mategeko ya ICJ.
Minisitiri w’Umutekano muri iki gihugu, Yoav Gallant, yavuze ko Igisirikare cya IDF kizakomeza kugaba ibitero muri Rafah mu guhangana na Hamas, kinabohore abagizwe abaturage ba Israel bashimuswe n’uyu kuva mu mwaka washize.
