Urukiko rw’Ibanze rwa Kicukiro rwategetse ko Dr Emmanuel Semwaga afungwa by’agateganyo mu gihe hagikomeje iperereza ku byaha akurikiranyweho bifitanye isano n’akazi k’ubuvuzi yakoraga bwo gufasha abafite ibibazo byo kubura urubyaro.

Uyu muganga uzwi cyane mu Rwanda no hanze yarwo kubera ubuhanga bwe mu buvuzi bw’imyororokere, yari amaze ibyumweru aburana ku ifungwa n’ifungurwa ry’agateganyo nyuma yo gutabwa muri yombi n’inzego z’ubugenzacyaha.

Urubanza rwe rwabereye i Kigali, aho bamwe mu barukurikiranye bavuga ko ibice bimwe byaburanishijwe mu muhezo kubera imiterere y’ibirego birebana n’amakuru yihariye y’abarwayi ndetse n’ubuvuzi bw’imyororokere.

Amakuru arambuye ku byaha akekwaho ntabwo aratangazwa mu buryo bwuzuye n’inzego zibishinzwe, gusa bivugwa ko bifitanye isano na serivisi zo gufasha abantu kubona urubyaro hakoreshejwe uburyo bugezweho burimo IVF ndetse n’ibijyanye no gutwitira abandi.

Dr Semwaga ni umwe mu baganga bake bafite ubunararibonye mu kuvura indwara z’abagore no gufasha abafite ibibazo byo gusama. Yubatse izina rikomeye mu myaka ishize, cyane cyane mu buvuzi bwo gufasha couples zibura urubyaro kubona abana binyuze mu ikoranabuhanga rigezweho.

Yigeze gukorera ibitaro bya La Croix du Sud biherereye i Remera mbere yo gukomeza ibikorwa bye mu bindi bitaro byigenga byo mu Mujyi wa Kigali. Abarwayi benshi bamuganaga bavuga ko yari umwe mu baganga bizewe cyane muri uru rwego.

Bamwe mu bakozi bo kwa muganga bavuga ko Dr Semwaga yakiraga umubare munini w’abarwayi buri munsi, cyane cyane abafite ibibazo byo kudasama cyangwa abafite gahunda zo gukoresha uburyo bwa IVF.

Mu mwaka ushize, u Rwanda rwashyizeho itegeko rigena imikorere ya serivisi z’ubuvuzi bw’imyororokere harimo gutanga intanga, IVF, gutwitira abandi ndetse n’amasezerano abigenga hagati y’impande zibirebwa. Iri tegeko ryashyizweho mu rwego rwo gukomeza kugenzura no gutuma izi serivisi zitangwa mu buryo bwemewe n’amategeko.

Bivugwa ko bimwe mu birego Dr Semwaga akurikiranyweho bishobora kuba bifitanye isano n’ishyirwa mu bikorwa ry’iri tegeko ndetse n’uburyo zimwe muri izo serivisi zatangwaga.

Ifungwa rye ryakuruye impaka nyinshi ku mbuga nkoranyambaga no mu miryango myinshi y’Abanyarwanda, cyane cyane abamubonaga nk’umwe mu baganga bafite uruhare rukomeye mu gufasha imiryango yari yarabuze urubyaro.

Nyuma y’icyemezo cy’urukiko, Dr Semwaga azakomeza kuburana afunzwe muri gereza ya Kigali i Mageragere mu gihe iperereza rikomeje.