Uyu muti wakozwe n’Ikigo cyo muri Amerika kimenyerewe ku gukora inkingo, Gilead Sciences.

Uyu muti wakorewe igerageza rya mbere n’irya kabiri mu 2024, ibisubizo bivuyemo bigaragaza ko nta ngaruka ugira ku buzima bw’abawutewe mu ngeri zitandukanye zabo kandi nta ngaruka z’ubuziba bibagiraho.

Itangazo rya Gilead Sciences rigaragaza ko uyu muti uterwa umuntu rimwe mu mezi atandatu, ni ukuvuga inshuro ebyiri mu mwaka.

Umuyobozi Mukuru wa Gilead Sciences, Daniel O’Day, yatangaje ko uyu muti wagaragaje ubushobozi bwo kurinda umuntu ubwandu bwa SIDA ku rugero rwa 99,9%.

Ati “Ni umunsi w’amateka mu myaka myinshi mu rugamba rwo kurwanya agakoko gatera SIDA. Yeztugo ni bumwe mu buvumbuzi bugezweho mu gihe cyacu kandi butanga amahirwe yo kurandura icyorezo cya SIDA.”

“Uyu ni umuti bisaba ko uwuterwa inshuro ebyiri mu mwaka gusa kandi mu masuzuma yakozwe watanze umusaruro ufatika, bivuze ko ushobora kuzana impinduka mu rugamba rwo gukumira SIDA. Abahanga ba Gilead bafashe intego yo kurandura SIDA, ndetse ndetse ubu kuva FDA yemeje Yeztugo, dufatanyije n’abafatanyabikorwa bacu, iyi ntego tuzayigira impamo.”

Umuyobozi Mukuru ushinzwe Kurwanya SIDA na Hepatite mu Ishami ry’Umuryango w’Abibumbye ryita ku Buzima (OMS), Dr. Meg Doherty yavuze ko uyu muti wiyongereye ku buryo bwinshi bukoreshwa mu kwirinda SIDA.

Ati “Turi gukorana n’abafatanyabikorwa ngo umuti wa Lecanapavir ugere ku bantu bawukeneye cyane, ubagereho vuba, kandi nta busumbane.”

OMS ivuga ko ko izatangaza amabwiriza y’uburyo umuti wa ‘Lenacapavir’ uzajya ukoreshwa, mu Nama Mpuzamahanga kuri SIDA izabera i Kigali ku wa 14 Nyakanga 2025

Minisitiri w’Ubuzima, Dr. Sabin Nsanzimana abinyujije kuri konti ye ya X yagaragaje ko ari intambwe ikomeye ariko “ibiciro no kuwugeza ku bawukeneye biracyari imbogamizi. Iyi izaba ingingo nyamukuru mu nama ya IAS2025 i Kigali”

OMS isaba abantu gukoresha uburyo bwo kwirinda SIDA bakoresheje bakoresheje ibinini binyobwa n’abatanduye ariko bafite ibyago byo kwandura, bakabifata buri munsi cyangwa buri kwezi na CAB-La inakoreshwa mu bigo nderabuzima bimwe byo mu Rwanda.

Imibare igaragaza ko abantu bafite ubwandu bwa SIDA barenga miliyoni 25,6 baba munsi y’ubutayu bwa Sahara, bangana na bibiri bya gatatu by’abayirwaye bose.