GAKENKE: URUBYIRUKO RWASABWE GUKOMERA KU NDANGAGACIRO N’UMUCO NYARWANDA
Mu Mirenge igize Akarere ka Gakenke hatangijwe ku mugaragaro gahunda y'Intore mu biruhuko, ku nsanganyamatsiko igira iti "Ubuzima bwiza, Agaciro kanjye" Ku rwego rw’Akarere yatangirijwe ku kigo cy’urubyiruko ‘Yego Center’.
Ni igikorwa cyitabiriwe n’Umuyobozi w’Akarere, Madamu Mukandayisenga Vestine, Visi Meya ushinzwe Imibereho Myiza y’Abaturage, Madamu Uwamahoro Marie Therese, abahagarariye inzego z’Umutekano, Urubyiruko, Abanyamabanga Nshingwabikorwa b’Imirenge ya Nemba na Gakenke n’abandi batandukanye. Umushyitsi mukuru yari Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Ngabo Brave Olivier.
Umunyamabanga Uhoraho muri Minisiteri y’Urubyiruko n’Iterambere ry’Ubuhanzi, Ngabo Brave Olivier, yasabye urubyiruko gukurikirana neza ibiganiro n’imikorongiro bitangirwa muri gahunda y'Intore mu biruhuko, kuko bizabafasha gukurana indangagaciro ziboneye.
Ati “Tuzanigiramo indangagaciro ndetse n’ababyeyi tubafashe guherekeza abana babo muri ibi biruhuko kugira ngo bazagire icyo bavana aha basubiye ku ishuri cy’uburere mboneragihugu, gikomeza kubaherekeza mu buzima busanzwe.”
Umuyobozi w’Akarere, Madamu Mukandayisenga Vestine yavuze ko “Iyi gahunda izafasha kubungabunga ubuzima bw’urubyiruko mu birihuko”
Muri rusange, iki gikorwa cyaranzwe n’imyidagaduro mu mbyino n’indirimbo, imikino itandukanye irimo iyo gusimbuka umugozi n’urukiramende, gusiganwa (agati), imikino y’umupira w’amaboko (Handball & Volleyball) n’iy’uw’amaguru (Football), Karate n’iyindi.
Urubyiruko rwahawe ibiganiro byibanze ku bikorwa biteganyijwe muri iyi gahunda y’Intore mu biruhuko birushishikariza Kwirinda amacakuburi, Kwimakaza ubumwe n'ubwiyunge n’Indangagaciro na Kirazira by'Umuco Nyarwanda.
Yanditswe na Nkurunziza Bonaventure
