Sosiyete y’u Rwanda ishinzwe Ingufu, REG, yabwiye abafatabuguzi bayo ko kubera imirimo yo kwagura imwe mu miyoboro yayo, hazabaho ibura ry’umuriro w’amashanyarazi mu bice bitandukanye by’Umujyi wa Kigali no mu Ntara y’Iburengerazuba.
Mu Mujyi wa Kigali iryo bura ry’umuriro riteganyijwe ku wa Gatanu tariki ya 12 Nzeri 2025 nibura amasaha ane ni ukuvuga kuva saa Tanu za mu Gitondo kugera Saa Cyenda z’umugoroba.
Biteganyijwe ko hazaba hari gusanwa umuyoboro w’amashanyarazi wa Rutunga, umuriro ukazabura mu bice bitandukanye byo mu Karere ka Gasabo nka Gikomero, Rutunga, Rusororo n’ibice by’Umurenge wa Ndera.
Mu ntara y’Iburengerazuba, Ibura ry’umuriro riteganyijwe ku wa Kabiri tariki ya 9 Nzeri 2025, ubwo hazaba hari gusanwa imiyoboro ya Kilinda Mission na Birambo umuriro ukaba uzabura nibura amasaha abiri guhera Saa Sita z’amanywa kugera Saa Munani.
Biteganyijwe ko umuriro uzabura mu mirenge ya Gashari, Rugabano, Murambi, Murundi, Ruganda n’ibice bya Rubengera mu Karere ka Karongi; Umurenge wa Mukura mu Karere ka Rutsiro n’Umurenge wa Nyange mu Karere ka Ngororero.
REG yasabye abantu bose kwitondera insinga z’amashanyarazi ngo kuko umuriro ushobora kugaruka mbere y’amasaha yateganyijwe inisegura ku ibura ry’amashanyarazi rizabaho mu gihe iyo mirimo izaba iri gukorwa.
Umuyobozi Mukuru wa Sosiyete y’u Rwanda ishinzwe Ingufu (REG), Eng. Armand Zingiro, yabwiye IGIHE dukesha iyi nkuru ko ko hari gushyirwa imbaraga mu gukemura ibibazo bikomeje kugaragara by’ibura ry’umuriro rya hato na hato mu bice bitandukanye by’igihugu.
REG yanagiriye inama abantu bafite ibikoresho n’ibicuruzwa bitihanganira ibura ry’amashanyarazi na rito, REG yo kugira inyunganizi (backup generator) ishobora gufasha mu gihe cyose habaye ibura ry’amashanyarazi ryayo.
