Kinshasa: Imfungwa zirenga 1,600 ziri mu zari zifungiye muri gereza ya Makala zarekuwe
Kinshasa: Imfungwa zirenga 1,600 ziri mu zari zifungiye muri gereza ya Makala zarekuwe
Imfungwa zirenga 1,600 ziri mu zari zifungiye muri gereza ya Makala iherereye i Kinshasa, zarekuwe ku Cyumweru tariki ya 22 Nzeri kubera impamvu z’uburwayi.
Uyu ni wo mubare munini RDC irekuye icyarimwe, mu gikorwa kimaze iminsi cyo kugabanya ubucucike muri za gereza.
Minisitiri w’ubutabera Constant Mutamba wari ukuriye iki gikorwa, yumvikanye anenga gereza gufunga abantu barwaye mu buryo bukomeye kandi batavurwa bikwiriye.
Amashusho yagaragaje bamwe mu barekuwe batwawe ku ngorofani kubera ibisebe bikabije bafite ku maguru ndetse n’intege nke zitabemerera kwigenza.
Gereza ya Makala ni yo ifungiyemo abantu benshi Congo, ikaba yubatswe igenewe gufunga abantu 1,500. Icyakora kuri ubu irimo abarenga 15,000, nk’uko imiryango itegamiye kuri leta ibivuga.
Abafunguwe ku cyumweru bakurikiye abarenga 600 bafunguwe ku wa Gatandatu.
Bamwe mu barekuwe bumvikanye bashima Perezida Félix Tshisekedi kuko abakuriye ubutabera bavuga ko ari we wategetse ko imfungwa zimwe zirekurwa mu kugabanya ubucucike mu magereza.
Gusa bamwe mu baharanira uburenganzira bwa muntu banenga uburyo abantu bamwe bafungwa muri za gereza muri DR Congo bakamara imyaka bataraburanishwa.
Minisitiri Mutamba yumvikanye abwira abarekuwe ko mu gihe bakwitwara nabi bageze hanze bazahita bongera bagafungwa.
Kurekura imfungwa ubu zibarirwa mu bihumbi birenga bibiri mu byumweru bicye bishize bikurikiye kugerageza gutoroka gereza kwiciwemo imfungwa 129 ku mibare yatanzwe na leta.
