Ku munota wa 7 Rukundo Abdul Rahman wa Kiyovu Sports yashoboraga gufungura amazamu ku mupira mwiza yari abonye ari mu rubuga rw’amahina ariko arekuye ishoti Pavelh Ndzira aratabara.

Urucaca rwakomeje kurusha Rayon Sports ibijyanye no guhererekanya ndetse ikabona uburyo buremereye imbere y’izamu nk'aho Moise Bulaya yari asigaranye n’umunyezamu bonyine ariko agatinda gutera bikarangira bamwatse umupira.

Ku munota wa 27 Mbonyingabo Regis wa Kiyovu Sports yagize ikibazo cy’imvune asimburwa na Bukuru Christophe. Ku munota wa 37 Rayon Sports yabonye uburyo buremereye imbere y’izamu ku ishoti riremereye ryari rirekuwe na Ndayishimiye Richard ariko rinyura hejuru y’izamu gato.

Ku munota wa 42 Rutahizamu wa Rayon Sports, Ndikumana Asman yafunguye amazamu ku mupira mwiza yahawe na Tambwe Gloire ndetse igice cya mbere kirangira ikiyoboye n’igitego 1-0.

Mu gice cya kabiri Afhamia Lotfi yaje akora impinduka mu kibuga havamo Sindi Paul Jesus hajyamo Aziz Bassane. Rayon Sports yakomeje gusatira cyane ndetse ku munota wa 63 yashoboraga kubona penariti ku ikosa umunyezamu wa Kiyovu Sports yari akoreye Aziz Bassane ariko umusifuzi arasanza.

Kiyovu Sports yanyuzagamo ikagera imbere y’izamu ndetse yabonye kufura nziza ariko Ishimwe Jean Rene ayitera mu buryo butatanze umusaruro.

Ku munota wa nyuma w'umukino Ndikumana Asman yatsinze igitego cya kabiri, umukino uhita urangira Rayon Sports itahanye amanota atatu itsinze Kiyovu Sports ibitego  2-0.