RDC yababajwe bikomeye n'inkunga umuryango w’Ubumwe bw’u Burayi uteganya guha Ingabo z’u Rwanda
RDC yababajwe bikomeye n'inkunga umuryango w’Ubumwe bw’u Burayi uteganya guha Ingabo z’u Rwanda
Repubulika Iharanira Demokarasi ya Congo yamaganye inkunga Umuryango w’Ubumwe bw’u Burayi uteganya guha Ingabo z’u Rwanda, mu rwego rwo kuzifasha mu bikorwa byo kugarura amahoro zirimo mu ntara ya Cabo Delgado.
EU irateganya guha u Rwanda inkunga ya $ miliyoni 20 yiyongera kuri miliyoni 20 z’ama-Euro yaruhaye muri 2022.
Mbere y’uko u Rwanda ruhabwa aya mafaranga cyakora ibihugu 27 bigize uriya muryango bigomba kubanza kubiganiraho, ndetse byitezwe ko ibiganiro bizaba mu byumweru bike biri imbere.
Kuva muri Nyakanga 2021 u Rwanda rwohereje ingabo mu ntara ya Cabo Delgado iherereye mu majyaruguru ya Mozambique, mu rwego rwo kuyirukanamo ibyihebe byari bimaze imyaka ibarirwa muri ine byarayigaruriye.
Ingabo z’u Rwanda zifatanyije n’iza Mozambique ndetse n’iz’umuryango wa SADC zashoboye kwirukana ibi byihebe byo mu mutwe wa Ansar Al-Sunna, ndetse zinafasha abaturage bari barahunze gusubira mu byabo.
Mu gihe byitezwe ko u Rwanda rushobora guhabwa na EU iriya nkunga, Kinshasa yayamaganye ivuga ko ihagarariye "umurongo utukura".
Umwe mu bakozi ba Perezidansi ya RDC yabwiye RFI ko kuba EU iteganya guha ubundi bufasha Ingabo z’u Rwanda ari "ugufasha igisirikare gishinjwa kugira uruhare mu makimbirane yo muri Kivu y’Amajyaruguru", ibyo yahereyeho yemeza ko buriya bufasha bushya ari "ikimenyetso cyerekana ko Brussels yifatanyije na Kigali".
Inkunga nshya Umuryango w’Ubumwe bw’u Burayi iteganya guha u Rwanda mu gihe yaba itanzwe yakwiyongera ku masezerano y’ubufatanye impande zombi zasinyanye mu kwezi gushize mu byerekeye amabuye y’agaciro.
Ni amasezerano na yo yarakaje cyane ubutegetsi bw’i Kinshasa buvuga ko agamije gutuma u Rwanda rukomeza "gusahura amabuye y’agaciro ya Congo".
Kuri ubu amakuru avuga ko ibihugu by’u Bufaransa na Portugal bishyigikiye ko u Rwanda rwahabwa iriya nkunga, mu gihe u Bubiligi na Espagne bitabishaka.
