Kimwe n’ahandi mu turere dutandukanye tw’Igihugu, kuri uyu wa 13 Mutarama 2026, mu Karere ka Rulindo,mu murenge wa Base hatangijwe ku mugaragaro Urugerero rw’Inkomezabigwi icyiciro cya 13. iki gikorwa ku rwego rw’umurenge wa Base cyabereye mu kagari ka gitare, mu mudugudu wa gatete, cyitabiriwe n’abayobozi batandukanye barimo n'umunyamabanga nshingwabikorwa w'umurenge wa Base Placide Uwiringiye n’urubyiruko rwitabiriye iyi gahunda y’igihugu.
Uyu muhango wari witabiriwe n’umuyobozi w'umurenge wa Base , Bwana Uwiringiye Placide, ari kumwe na Madamu Mukakanani Marie Jose ushinzwe uburezi mu murenge wa Base.
Mu ijambo rye, Bwana Placide Uwiringiye yashimiye byimazeyo urubyiruko rwemeye kwitabira gahunda y’urugerero rw’inkomezabigwi, anashimira ababyeyi n’imiryango yabohereje, abizeza ko umurenge , ufatanyije n’izindi nzego zitandukanye, uzakomeza gutoza urubyiruko umuco w’ubukorerabushake, ubwitange, gukunda igihugu no kugiteza imbere, binyuze mu rugerero no mu zindi gahunda zinyuranye zigamije kubaka umunyarwanda wuzuye.
Agaruka ku nsanganyamatsiko y’uru rugerero igira iti: “Duhamye umuco w’ubutore twimakaza ubumwe n’ubudaheranwa”, Bwana Placide Uwiringiye yasabye urubyiruko ruri mu rugerero rw’inkomezabigwi 13 guharanira ubutore, gukomera ku ndangagaciro z’umuco nyarwanda no kwimakaza ubumwe n’ubudaheranwa mu bikorwa byose ruzakora. Yanabibukije akamaro ko kwitabira neza gahunda zose zateganyijwe mu gihe cy’urugerero, kuko ari zo zizabafasha kuba abaturage bafite inshingano n’uruhare rufatika mu iterambere ry’igihugu.
Gahunda y’urugerero inkomezabigwi icyiciro cya 13 yitabiriwe n’abanyeshuri basoje amashuri yisumbuye mu mwaka w’amashuri wa 2024/2026, bikaba byitezwe ko izasozwa urubyiruko rwayitabiriye rufite ubumenyi ku bijyanye n’umuco w’ubukorerabushake, ubumwe bw’abanyarwanda n’ubudaheranwa, gukunda igihugu, ndetse n’izindi ndangagaciro zubaka umunyarwanda w’ejo hazaza.
Yanditswe na nkurunziza Bonaventure
