Sosiyete ya Spiro yahaye Mount Kigali University moto 5 abanyeshuri bazigiraho
Sosiyete ikora moto zikoresha amashanyarazi mu Rwanda, Spiro yagiranye amasezerano y’ubufatanye na Kaminuza ya Mount Kigali agamije ubufatanye mu guteza imbere ubwikorezi budafite ingaruka mbi ku kirere, ubushakashatsi no guhanga ibishya mu Rwanda.
Spiro yatanze moto 5 abanyeshuri ba Mount Kigali bazajya bigiraho.
Amasezerano impande zombi zasinyiye, arimo ubufatanye hagati yayo na Spiro na Mount Kigali mu guteza imbere gahunda y’ubwikorezi butangiza ikirere, no gushyigikira intego z’igihugu mu kugera ku ntego zo kutangiza ikirere.
Muri iyo gahunda sosiyete ya Spiro yatanze moto 5 zizafasha mu kwigisha abanyeshuri, ndetse no mu bundi bukangurambaga.
Spiro na Mount Kigali University byiyemeje gufatanya mu bushakashatsi, mu gushaka inkunga zigenerwa imishinga irimo guhanga udushya, kugera ku bipimo by’ubuziranenge (EV quality standards), no gushakira hamwe amahirwe ashobora kuboneka mu bucuruzi.
Mu bindi impande zombi ziyemeje ni ukuba Spiro izafasha abanyeshuri n’abakora muri Kaminuza ya Mount Kigali, guhabwa moto ku giciro cyo hasi, zikabafasha gukora ingendo zijya n’iziva ku ishuri mu buryo bworoshye.
Umuyobozi Mukuru wa Spiro, Kaushik Burman, avuga kuri aya masezerano yasinywe kuri uyu wa Gatanu tariki ya 22 Kanama, 2025 yavuze ko ubu bufatanye bugamije kurushaho kumvikana mu bijyanye n’ibyo bakora no mu bucuruzi harimo gukorana kugira ngo bagere ku ntego z’iterambere rirambye by’umwihariko guhindura urwego rw’ubwikorezi mu Rwanda.
Ati “Muri iki gihe hari ikibazo cy’imihindagurikire y’ibihe ni ingenzi gukorana n’abo mu burezi, nka Kaminuza ya Mount Kigali kuko ikigo nka Spiro gikora neza ibinyabiziga cyafasha abanyeshuri kuzamura ubumenyi by’umwihariko abanyeshuri baba barangije bakava ku ntebe y’ishuri bakagera mu rwego rw’umurimo.”
Yavuze ko bashoye imari mu Rwanda mu bijyanye n’ibikorwa remezo, naho hogukorera ibikorwa byabo bityo ngo bakeneye urubyiruko rufite impano kubasanga, kuko ari ahantu ho gutangirira impinduka mu gukoresha uburyo bw’ubwikorezi butangiza ikirere.
Muri ariya masezerano ngo abanyeshuri bazaba bashobora gusura aho inganda za Spiro zikorera, bahigire kandi bifashe mu gukora integanyanyigisho izafasha abanyeshuri kwinjira mu buryo inganda zikora.
Umoyobozi Mukuru wa Kaminuza ya Mount Kigali, Martin Kimemia ashimnagira ko iyi mikoranire mishya na Spiro izarushaho kuzana impinduka mu burezi butangirwa muri iyi kaminuza.
Ati “Twizera neza ko ibijyanye n’ubufatanye birafasha cyane. Amasezerano tugiranye uyu munsi, arafasha abarimu, abakozi ba kaminuza, abanyeshuri, kugura izi moto zikoresha amashanyarazi ku giciro cyo hasi. Bamwe mu banyeshuri baturuka kure bizabafasha gukora ingendo zitandukanye neza, kandi bibafashe mu myigire.”
