Mu nteko y’abaturage, Mukayiranga Dariya avuga ko ubusanzwe ari umugore ukunda Igihugu n’abagituye akavuga ko yiyemeje kujya akorera abaturage ubuvugizi nta kiguzi ahawe.

Mukayiranga wo mu Kayenzi, umurenge wa Ntongwe, yabwiye UMUSEKE dukesha iyi nkuru  ko yasabye ko Umurenge wa Ntongwe uhabwa umuriro w’amashanyarazi, ubuyobozi burawutanga, asaba ko bawegereza Ivuriro rya Nyarurama (Poste de Santé) barawubaha, yongera gusaba  ko ikiraro cyaguyemo umukozi ushinzwe ubutaka mu Karere cyubakwa birakorwa, avuga ko mu bindi yasabye harimo kugereza amazi meza, ndetse n’imodoka ishinzwe isuku n’umutekano.

Ati: ”Muri iyi nteko naje gushimira Ubuyobozi bw’Akarere kacu ko bwumvise ibyo nasabaga mu izina ry’abaturage burabiduha.”

Uyu mugore avuga ko asaba impuzanzira (Network) kubera ko abatuye mu Kagari ka Nyamirama, Nyakabungo na Gako batayifite.

Ati: ”Nasabye ubuyobozi ko babwira MTN ikahashyira umunara kuko iyo ugeze muri  utwo Tugari udashobora guhamagara cyangwa ngo witabe kubera ko nta mpuzanzira ihaboneka.”

Mbarushimana Sylvestre avuga ko iyo bafite hari ibyo bakeneye bifuza ko bigera ku buyobozi bw’umurenge wa Ntongwe cyangwa ubw’Akarere babinyuza kuri uyu mugore.

Ati: ”Ibyo twasabye byose tubinyujije kwa Mukayiranga twarabihawe.”

Uyu muturage avuga ko iyo Igihugu gifite imiyoborere myiza abaturage bahabwa ijambo bagatanga ibitekerezo, ubuyobozi bukabiheraho bubegereza ibikorwaremezo baba bakeneye.

Umuyobozi wungurije Ushinzwe Iterambere ry’Ubukungu mu Karere ka Ruhango, Rusiribana Jean Marie avuga ko mu myaka yashize bazaga gukorana ibiganiro n’abatuye uyu Murenge, bagasanganizwa ibibazo.

Ati: ”Mwabonye ko muri iyi nteko nta bibazo byinshi twakiriye, harimo iby’ubutaka, amakimbirane n’ibindi uyu munsi abaturage bageze ku rwego rwiza rwo gusaba ibikorwaremezo.”

Rusiribana avuga ko ibyo Mukayiranga yasabye byo gushyira umunara muri utwo Tugari bagiye kubikora kugira ngo abahatuye babone uko bazajya bahamagara.

Mukayiranga Dariya akunze kumvikana ahamagara Abanyamakuru agashima, ndetse akanenga bamwe mu bayobozi bo mu Nzego z’Ibanze bananiwe guha abaturage serivisi babifuzaho.