Umusore w’imyaka 26 wo mu Karere ka Rwamagana wari waburiwe irengero ku munsi yari ategerejweho gukora ubukwe yongeye kuboneka ari muzima, ibintu byakuye benshi mu gihirahiro nyuma y’iminsi mike abaturage n’abo mu muryango we bamushakisha.

Uyu musore yari yarabuze kuva mu rukerera rwo ku wa 2 Gicurasi 2026, umunsi nyirizina ubukwe bwe bwagombaga kubera. Abaturage bo mu Murenge wa Mwulire, Akagari ka Bishenyi, bavuga ko batunguwe no kubura amakuru ye mu gihe imyiteguro y’ubukwe yari igeze kure ndetse imodoka zari zitegereje abatashye zari zamaze kuhagera nijoro.

Amakuru yari yakwirakwiye mbere y’ubukwe yerekanaga ko gusaba no gukwa byari biteganyijwe kubera muri Regina Pacis Rambura mu Karere ka Nyabihu. Icyakora, ubwo abo bari kumuherekeza batangiraga kumuhamagara kuri telefone kugira ngo urugendo rutangire, ntibasubijwe ndetse no mu rugo rwe ntibamubona.

Kwamamaza kubura kwe byahise bikwira mu baturage ndetse bamwe batangira gukeka ko yaba yagize ikibazo cyangwa se yashimuswe. Hari n’abavugaga ko ashobora kuba yaragize ubwoba bwo kwinjira mu rushako, mu gihe abandi bakekaga ko haba hari ikibazo cyavutse hagati ye n’umugeni.

Umunyamabanga Nshingwabikorwa w’Umurenge wa Mwulire, Rugengamanzi Steven, yavuze ko uwo musore yaje kuboneka ku gicamunsi cyo ku wa Mbere agarutse aho yabaga akodesha ari muzima kandi nta kibazo kigaragara afite.

Yavuze ko nyuma y’igihe gito uwo mukobwa bari bagiye gukora ubukwe na we yahise ahagera ari kumwe n’abo mu muryango we ndetse azana n’ibikoresho byari biteganyijwe mu rugo rushya, ibintu byatumye benshi bumva ko impande zombi zishobora gukomeza gahunda yo kubana.

Amakuru yamenyekanye nyuma yaho avuga ko mbere yo kubura, uwo musore yari yabwiye umugeni ko yumvaga hari abantu bari kuvanga mu mubano wabo no mu mitegurire y’ubukwe bwabo, ibintu byamuteraga kutamererwa neza. Ngo ni yo mpamvu yafashe icyemezo cyo kugenda by’agateganyo kugira ngo abanze atekereze neza ku hazaza he.

Nubwo ikibazo cyateye impaka n’amagambo menshi ku mbuga nkoranyambaga no mu baturage, ubuyobozi bwavuze ko nta kimenyetso cyagaragaje ko uwo musore yashimuswe cyangwa yagiriwe nabi. Kugeza ubu amakuru avuga ko we n’umugore we bari kumwe kandi bakomeje ibiganiro byerekeye ubuzima bwabo bw’ahazaza.