Abanya-kigali bamwe bahangayikishijwe n’ikiguzi cyo gushyingura gikomeje gutumbagira
Abanya-kigali bamwe bahangayikishijwe n’ikiguzi cyo gushyingura gikomeje gutumbagira
Abanyakigali bamwe bahangayikishijwe n’ikiguzi cyo gushyingura gikomeje gutumbagira biturutse ku guhenda kw’ikuguzi cy’imva, isanduku, gukodesha imodoka itwara umurambo n’imihango irimo gukaraba n’indi ijyana no gusezera no gushyingura.
Abahanga mu mitekerereze ya muntu bagaragaza ko abashyingura ababo badakwiye gusesagura cyangwa gukoresha nabi umutungo wabo n’uwa nyakwigendera.
Bamwe mu baturage bo hirya no hino muri Kigali baganiriye na RBA, bagaragaje ko gushyingura ari umuhango usigaye uhenze ku buryo kuwukora udafashijwe n’abandi muri iyi minsi byakorwa na bacye.
Babishingira ku kiguzi bitwara, cy’uburyo agera ku irimbi, imva ashingurwamo n’indi mihango irimo no gukaraba bitajya mu nsi y’ibihumbi nka 300Frw ku badafite ubushobozi, abakire bo bashobora gukoresha hejuru ya miliyoni 5Frw.
Hari aho bisaba n’indabo zo gushyira ku mva na zo zigura ari hejuru y’ibihumbi 150Frw ku bafite ubushobozi, ariko haboneka n’izishobora kugura 1000Frw bitewe n’ubwoko bwazo.
Amarimbi yo agenda arutanwa mu biciro aho nk’irya Rusororo mu Karere ka Gasabo, hari abishyura asaga miliyoni 2Frw bitewe n’ubushobozi bw’abagize umuryango w’uwitabye Imana.
Ni muri urwo rwego leta itanga inama yo guhindura uburyo bwo gushyingura, aho Itegeko ryo mu 2013 riteganya ko abaturage babyemeye bajya batwika imibiri y’ababo bagashyingura ivu ahantu hato, bigafasha kugabanya ubutaka bwo gushyinguraho.
