BRALIRWA yatangaje ko mu mezi atandatu ya mbere y’umwaka wa 2025 rwungutse Miliyari 18,4 Frw
BRALIRWA yatangaje ko mu mezi atandatu ya mbere y’umwaka wa 2025 rwungutse Miliyari 18,4 Frw
Amafaranga yungutswe na BRALIRWA muri ayo mezi yazamutseho 24,1 % kuko mu gihe nk’icyo mu 2024 yari yungutse miliyari 14,8 Frw.
Muri rusange BRALIRWA yinjije miliyari 32 Frw, mu mezi atandatu ya mbere y’umwaka wa 2025, avuye kuri miliyari 26 Frw yari yinjije mu mezi atandatu ya mbere ya 2024.
Uru ruganda ruvuga ko kwiyongera kw’amafaranga rwinjiza byatewe n’impamvu zitandukanye zirimo kwiyongera kw’ingano y’ibicuruzwa bisembuye n’ibidasembuye rushyira ku isoko, guhindura ibiciro ngo birusheho kujyana n’isoko ndetse no gukundwa kw’ibinyobwa byarwo bigenda birushaho kwiyongera.
Nubwo amafaranga BRALIRWA yinjije kuva muri Mutarama kugeza muri Kamena 2025 yiyongereye, uru ruganda rugaragaza ko n’ayo rushora mu gukora ibinyobwa bitandukanye yazamutseho 22,5% ugereranyije n’ayo rwari rwashoye mu gihe nk’icyo mu 2024.
Ibi byatewe ahanini no kuzamuka kw’ikiguzi cy’ibyifashishwa mu gukora ibinyobwa byaba ibisembuye n’ibidasembuye, ndetse n’ibikoresho bitandukanye bipfunyikwamo.
Ikindi cyazamutse ni amafaranga uru ruganda rwashyize mu bikorwa byo kugeza ibicuruzwa ku baruhagarariye. Yazamutseho 25%.
Hari kandi amafaranga agenda mu mirimo ya buri munsi ijyanye n’imiyoborere y’uruganda yazamutseho 16,7%. Kuzamuka kw’aya mafaranga kwatewe ahanini n’ibikorwa byo kwimakaza ikoranabuhanga, ndetse n’ikiguzi cyatanzwe ku bakozi.
Umuyobozi Mukuru wa BRALIRWA, Ethel Emma-Uche, yavuze ko “Mu gice cya mbere cya 2025 twabonye kuzamuka mu bintu by’ingenzi, bitewe ahanini no kwiyongera kw’ibyo abakiliya bakeneye ndetse no kujyanisha mu buryo buhoraho ubwiza bw’ibicuruzwa n’ibiciro. Nubwo amafaranga dushora yakomeje kuzamuka, umusaruro twagezeho twawufashijwemo na gahunda zashyizweho zo kugabanya ikiguzi no gukoresha neza ibihari.”
Yakomeje avuga ko mu yandi mezi atandatu ya 2025 biteze ko umusaruro uzakomeza kuba mwiza.
Ati “Mu gice cya kabiri cya 2025, tuzakomeza gushimangira intego yacu yo gushyira imbere abakiliya bacu mu bijyanye n’imyanzuro yose dufata, ndetse no gushora imari mu buryo burambye n’imikorere ikwiriye.”
BRALIRWA yatangiye gukora ibinyobwa mu 1959. Ku bufatanye n’uruganda Coca-Cola rwo muri Leta Zunze Ubumwe za Amerika, yatangiye gukora ikinyobwa cya Coca-Cola mu 1974.
Ikinyobwa gishya cy’uru ruganda giherutse gushyirwa ku isoko ni inzoga ya ‘Desperados’. Ni inzoga BRALIRWA yamuritse binyuze muri HEINEKEN bisanzwe bikorana. Iri mu cyiciro cya byeri.
Yanditswe na Yadufashije Marie Rose
